.webp)
Advertisement
JMI Entrance Exam 2021:जामिया मिलिया इस्लामिया युनिव्हर्सिटीने पीएचडी अभ्यासक्रमांच्या प्रवेशांसाठी पीएचडी प्रवेश परीक्षा प्रक्रिया सुरू केली आहे. विद्यापीठ करोना संक्रमण काळात ऑफलाइन परीक्षा आयोजित करत आहे. मंगळवारी २२ जूनपासून ही परीक्षा सुरू झाली आहे आणि २८ जून पर्यंत सुरू राहणार आहे. ही परीक्षा दोन सत्रात आयोजित करण्यात आली आहे. यासंबंधी विद्यापीठाकडून जारी केलेल्या निवेदनात असं म्हटलंय की, जामिया मिलिया इस्लामियाने मंगळवारी आपल्या संकुलात पीएचडी प्रवेशांसाठी ऑफलाइन प्रवेश परीक्षा आयोजित केली होती. कोविड संबंधी मार्गदर्शक तत्त्वांचे पालन करून दोन सत्रात ही परीक्षा आयोजित करण्यात आली आहे. पीएचडी प्रवेश परीक्षा यंदा विद्यापीठाद्वारे आयोजित पहिली ऑफलाइन परीक्षा आहे. पीएचडीसाठी प्रवेश परीक्षा २८ जून पर्यंत सुरू राहणार आहे. विद्यापीठाच्या विविध विभागांमध्ये पीएचडी अभ्यासक्रमांसाठी एकूण १२ हजार उमेदवारांनी अर्ज केले आहेत. विद्यापीठाने निवेदनात म्हटले आहे की परीक्षेच्या एक दिवस अगोदर परीक्षा केंद्रांची स्वच्छता करण्यात आली आहे. उमेदवारांना आपापली पाण्याची बाटली आणि हँड सॅनिटायझर आणण्यास सांगण्यात आले आहे. या व्यतिरिक्त परीक्षार्थींना फेस मास्क आणि तापमान चाचणीसह परीक्षा केंद्रात प्रवेश देण्यात आला होता. परीक्षेत सोशल डिस्टन्सिंगच्या नियमांचं पूर्ण पालन करण्यात आलं आहे. विद्यापीठ परिसरात विविध परीक्षा केंद्रांवर विद्यार्थ्यांसाठी वेटिंग रुम बनवण्यात आली आहे. जामियाच्या कुलगुरू नजमा अख्तर यांनी सांगितले की, कोविड महामारीच्या पार्श्वभूमीवर ऑफलाइन परीक्षा घेणे हे विद्यापीठासाठी एक मोठे आव्हान होते, पण ही काळाची गरजही होती. याआधी विद्यापीठाच्या अधिकाऱ्यांनी या महिन्याच्या सुरुवातीला सांगितलं होतं की करोना व्हायरस महामारीमुळे पीएचडी प्रवेश परीक्षेला एक वर्षाचा विलंब झाला आहे. तूर्त विद्यापीठ वर्तमान शैक्षणिक वर्ष २०२१-२२ ऐवजी वर्ष २०२०-२१ साठी पीएचडी प्रवेश परीक्षा आयोजित करत आहे.
from Career News in Marathi: Career News, मराठी Career बातम्या | Maharashtra Times https://ift.tt/2Upod8J
via nmkadda
