.webp)
Advertisement
म. टा. प्रतिनिधी, पुणे सावित्रीबाई फुले आणि आंतरराष्ट्रीय सांस्कृतिक संबंध परिषद (आयसीसीआर) पुण्यात शिक्षण घेणाऱ्या अफगाणी विद्यार्थ्यांना शैक्षणिक शुल्क, शिष्यवृत्ती मिळणे, निवासाची सोय, रोजगार उपलब्धता यासाठी मदत करणार असल्याची ग्वाही कुलगुरू डॉ. नितीन करमळकर आणि 'आयसीसीआर'चे अध्यक्ष खासदार विनय सहस्रबुद्धे यांनी शनिवारी दिली. तालिबानने अफगाणिस्तानवर वर्चस्व मिळवल्यानंतर पुण्यातील अफगाणी विद्यार्थ्यांसमोर शिक्षण, निवास, रोजगार यांची चिंता सतावू लागली आहे. या पार्श्वभूमीवर आणि माजी विद्यार्थी संघटनेच्या शिष्टमंडळाने डॉ. करमळकर यांची भेट घेतली. विद्यापीठाच्या व्यवस्थापन परिषदेचे सदस्य राजेश पांडे आणि सरहद संस्थेचे संजय नहार यांच्या पुढाकारातून ही बैठक झाली. अफगाणी विद्यार्थ्यांच्या समन्वयासाठी अफगाण माजी विद्यार्थी संघटनेने तयार केलेल्या हेल्पलाइनचे कुलगुरूंच्या हस्ते अनावरण करण्यात आले. अडचणीतील अफगाण विद्यार्थ्यांना ०२०-२५६२१९३८ या दूरध्वनी क्रमांकावर संपर्क साधता येईल. प्र-कुलगुरू एन. एस. उमराणी, विद्यापीठाच्या माजी विद्यार्थी कार्यालयाचे संचालक संजय ढोले आदी उपस्थित होते. डॉ. करमळकर म्हणाले, की विद्यापीठ आणि संलग्न महाविद्यालयांतील वसतिगृहात कोणत्याही कारणास्तव राहणे अवघड किंवा असुरक्षित वाटत असल्यास संबंधित अफगाण विद्यार्थ्यांची विद्यापीठाच्या आंतरराष्ट्रीय केंद्राच्या वसतिगृहात सोय केली जाईल. ज्या विद्यार्थांना सध्याच्या परिस्थितीमुळे पालकांकडून पैसे येत नसल्यास त्या विद्यार्थ्यांना विद्यापीठ आणि 'आयसीसीआर' शुल्कात सवलत किंवा शुल्कमाफी देण्याचा गांभीर्याने विचार करील; तसेच शिक्षण पूर्ण होऊन रोजगाराची गरज असलेल्या विद्यार्थ्यांना सर्वतोपरी मदत करण्यात येईल. विद्यार्थ्यांच्या शिष्यवृत्तीचा कालावधी वाढवण्याचा विचार केला जाईल, असे डॉ. करमळकर यांनी सांगितले. केंद्र सरकार पूर्ण ताकदीने अफगाणी विद्यार्थ्यांच्या पाठीशी आहे. सध्याच्या परिस्थितीत तेथे अडकलेल्या विद्यार्थ्यांना भारतात आणण्यासाठी परराष्ट्र मंत्रालयाच्या माध्यमातून विद्यार्थ्यांची व्हिसा प्रक्रिया सुलभ होण्याबाबत मार्ग काढला जाईल, अशी माहिती डॉ. सहस्रबुद्धे यांनी दूरध्वनीद्वारे उपस्थितांना दिली. विद्यार्थ्यांशी संवाद सिम्बायोसिस आंतरराष्ट्रीय अभिमत विद्यापीठात शिकणाऱ्या अफगाणी विद्यार्थ्यांना मानसिक-भावनिक आधार देण्यासाठी संवादात्मक कार्यशाळा घेण्यात आली. मानसिक ताण, दु:ख अशा भावनांना सामोरे जाण्यासाठी काय करावे, याबाबत मार्गदर्शन करण्यात आले. विद्यापीठाचे कुलपती डॉ. शां. ब. मुजुमदार, प्र-कुलपती डॉ. विद्या येरवडेकर यांच्यासह 'सिम्बायोसिस सेंटर फॉर इमोशनल वेलबिइंग'च्या प्रमुख डॉ. गिरीजा महाले, तन्मयी खांबेटे, सिम्बायोसिस सेंटर ऑर इंटरनॅशनल एज्युकेशनच्या उपसंचालिका डॉ. अनिता पाटणकर यांनी विद्यार्थ्यांशी संवाद साधला. 'सिम्बायोसिस मदतीसाठी तत्पर' 'सिम्बायोसिस अफगाणी विद्यार्थ्यांना मदत आणि मार्गदर्शनासाठी तत्पर असेल, असे डॉ. विद्या येरवडेकर यांनी सांगितले. 'एशिया फाउंडेशनमार्फत सिम्बायोसिस आंतरराष्ट्रीय विद्यापीठात शंभर अफगाण विद्यार्थिनींना व्यवस्थापन पदविका अभ्यासक्रमाला प्रवेश देण्यात येणार आहे,' अशी माहिती आंतरराष्ट्रीय प्रचार आणि प्रवेश विभागाच्या प्रमुख अमृता रुईकर यांनी दिली.
from Career News in Marathi: Career News, मराठी Career बातम्या | Maharashtra Times https://ift.tt/3mqzAte
via nmkadda
