.webp)
Advertisement
सुचित्रा सुर्वे, ग्रोथ सेंटर कोणत्याही नवीन गोष्टीशी जुळवून घेणे हे तणावपूर्ण आणि आव्हानात्मक असते. त्यामुळे हायस्कूलपासून कॉलेजपर्यंत झेप घेणे हेही कठीण होऊ शकते. सध्या हे विद्यार्थी पूर्णपणे नवीन वातावरणाशी जुळवून घेत आहेत- शाळा, विद्यार्थी, शिक्षक आणि नवीन अभ्यासक्रम- मात्र ऑनलाइन! सुरुवातीला जे मजेदार वाटत होते, ते आता कंटाळवाणे झाले आहे. विद्यार्थी 'ऑनलाइन' आहेत, पण याचा अर्थ असा नाही की, ते 'अभ्यास' करत आहेत. इथे हे लक्षात घेतले पाहिजे की, ऑनलाइन शिक्षणाबद्दल सर्व गोष्टी वाईट नाहीत. ऑनलाइन शिक्षणाचे अनेक फायदे आहेत, उदा. - सर्वसामान्य गोष्टीपलिकडे नवीन काही तरी शिकण्यास सक्षम करते. - विद्यार्थ्याला अमर्यादित विषयांचा तसेच एखाद्या विषयांतील जागतिक ज्ञानाचा लाभ घेता येतो. - ज्यांना संपूर्ण वर्गासमोर बोलणे कठीण वाटते, त्यांच्यासाठी ऑनलाइन हा एक चांगला पर्याय आहे. - अनेक ठिकाणी शिक्षक व्हॉट्सअॅप किंवा यूट्यूबवर व्हिडीओ शेअर करून 'क्लासेस' घेत आहेत. त्यामुळे विद्यार्थ्यांना आपापल्या सोयीनुसार हे पाहता येते. - विद्यार्थ्यांना जास्त प्रवास करावा लागत नाही. गेल्या वर्षभरातील अनुभवानंतर आता बहुतेक विद्यार्थ्यांना कॉलेज पुन्हा सुरू व्हावे, असे वाटत आहे, त्यांना प्रत्यक्ष वर्गात जाण्याची इच्छा आहे. मात्र सध्या तरी विद्यार्थ्यांना केवळ ऑनलाइन शिक्षण हाच एकमेव पर्याय आहे. विद्यार्थ्यांना कॉलेजमध्ये जुळवून घेण्यासाठी खाली काही मुद्दे उपयुक्त ठरू शकतात- - कॉलेज, अभ्यासक्रम नवीन असूनही त्याच्याशी जुळवून घेण्यास कमी समस्या येत असतील, तर त्याचे कारण म्हणजे ऑनलाइन शाळेत स्वतंत्रपणे अभ्यास करण्याचा अनुभव तुम्ही याआधीच घेतला आहे. - ऑनलाइन अभ्यासक्रमाकडेही 'प्रत्यक्ष' अभ्यासक्रमासारखेच पाहा. - कॉलेजची वेबसाइट पूर्णपणे धुंडाळून कॉलेजचा 'व्हर्चुअल' दौरा करा. यामुळे संस्था चांगल्या प्रकारे जाणून घेण्यास आणि तसेच जोडून घेण्यास मदत होईल. शक्य तितक्या लवकर कॉलेजच्या वेबसाइटवर (लॉगिन-पासवर्ड असल्यास त्यासह) लॉग-इन करा. कॉलेजमध्ये काय सुविधा आहेत, ते पाहण्यासाठी वेगवेगळ्या लिंकवर क्लिक करा आणि कॉलेजचा खऱ्या अर्थाने अनुभव घ्या. - वेळापत्रक, परीक्षा, स्पर्धा, अभ्यासेतर उपक्रम आदींसह कोणत्याही सूचनांसाठी ईमेल किंवा ऑनलाइन नोटीस बोर्ड किंवा अधिकृत वेबसाइट नियमितपणे तपासा. - तुमच्या फायद्यासाठी आणि तुमची शैक्षणिक कामगिरी वाढवण्यासाठी तंत्रज्ञानाचा वापर करण्यास शिका. तंत्रज्ञान हे केवळ गेम खेळण्यासाठी किंवा चॅट / अॅप्स वापरण्यासाठी नाही, हे लक्षात घ्या. - प्राध्यापकांशी संवाद साधण्याच्या स्वीकारार्ह पद्धती वापरा. उदा: कॉलेजचे अधिकृत अॅप किंवा ईमेल. - पहिल्या दिवसापासून वर्गात सहभाग घ्या. - काही विद्यार्थ्यांनी आपल्या शाळेतच इयत्ता अकरावीसाठी प्रवेश घेतला आहे. हे निश्चितच फायदेशीर आहे. विद्यार्थी त्याच शैक्षणिक संस्थेत असतात, त्यांना आपले शिक्षक माहीत असतात. त्यामुळे आवश्यक असल्यास ते वैयक्तिक सहाय्य आणि मार्गदर्शन करू शकतात. आपण कॉलेजमध्ये आहोत आणि तेही ऑनलाइन, हे लक्षात घ्या आणि अभ्यासावरून लक्ष विचलित होऊ देऊ नका. स्वतःची जबाबदारी घ्या- मग तो अभ्यास असो किंवा स्वत:चा विकास. चांगली तयारी केली, तर ऑनलाइन कॉलेजचे 'न्यू नॉर्मल' स्वरूप सहज अंगवळणी पडेल.
from Career News in Marathi: Career News, मराठी Career बातम्या | Maharashtra Times https://ift.tt/3gEB3sf
via nmkadda
