.webp)
Advertisement
म. टा. विशेष प्रतिनिधी, मुंबई इंजिनीअरिंग, फार्मसी, कृषी अभ्यासक्रमांच्या प्रवेशासाठी घेण्यात येणाऱ्या एमएचटी-सीईटीसाठी गेल्या वर्षीच्या तुलनेत यंदा सव्वा लाख विद्यार्थ्यांची नोंदणी कमी झाली आहे. बारावीचा निकाल वाढूनही विद्यार्थी या परीक्षेकडे फारसे फिरकलेले नाहीत, असे चित्र दिसत आहे. राज्य सामायिक प्रवेश परीक्षा कक्षाकडून राज्यातील इंजिनीअरिंग, औषधनिर्माणशास्त्र, कृषी पदवी अभ्यासक्रमांच्या प्रथम वर्ष प्रवेशासाठी एमएचटी-सीईटी घेण्यात येते. करोनाकाळ असूनही आणि प्रवेश प्रक्रिया उशिरा होऊनही गतवर्षी पाच लाख ४२ हजार ४३१ विद्यार्थ्यांनी अर्ज केले होते. यंदा बारावीच्या निकालाअगोदर अर्ज नोंदणी तसेच मुदतवाढ देऊनही चार लाख २४ हजार ७७३ विद्यार्थ्यांनी नोंदणी केली आहे. नोंदणी कमी झाल्याचे कारण मात्र करोनाकाळ हेच असल्याचेच अधिकाऱ्यांकडून सांगितले जात आहे. इतर प्रवेश परीक्षांची नोंदणी घटली इंजिनीअरिंग, फार्मसी, कृषी याबरोबरच लॉ, बीएड, हॉटेल मॅनेजमेंट, आर्किटेक्चर, एमबीए, एमसीए आदी व्यावसायिक अभ्यासक्रमांच्या प्रवेशासाठी कक्षाकडून दरवर्षी प्रवेश परीक्षा घेतल्या जातात. सीईटी गुणांच्या आधारे या अभ्यासक्रमांना प्रवेश दिले जातात. या अभ्यासक्रमांच्या राज्यभरातील विविध संस्थातील सुमारे चार लाख जागांवरील प्रवेश हे प्रवेशपूर्व परीक्षांच्या गुणावरच दिले जातात. यंदा या परीक्षा कधी होणार, याबाबत विद्यार्थ्यांना स्पष्ट कल्पना दिलेली नाही. विद्यार्थ्यांनी अर्ज नोंदणी पूर्ण केली आहे, मात्र परीक्षा कधी होणार, हेच सांगितलेले नाही. विविध १५ सीईटीसाठी राज्यभरातून तसेच, राज्याबाहेरील तब्बल सात लाख ७४ हजार ८५९ विद्यार्थ्यांनी अर्ज भरले आहेत. त्याचे शुल्कही भरले आहे. हे विद्यार्थी परीक्षांच्या तारखांच्या प्रतीक्षेत आहेत. एमएचटी सीईटी अर्जनोंदणी २०१९-२० ५,४२,४३१ २०२०-२१ ४,२४,७७३
from Career News in Marathi: Career News, मराठी Career बातम्या | Maharashtra Times https://ift.tt/2XPTaos
via nmkadda
