Advertisement
College Start: राज्यभरातील विद्यार्थ्यांसाठी महत्वाची बातमी आहे. राज्यातील महाविद्यालये १ नोव्हेंबरपासून सुरु होणार आहेत. पण अद्याप ऑफलाइन वर्गास परवानगी नसून ऑनलाइन वर्गातूनच महाविद्यालयीन विद्यार्थ्यांचे शिक्षण सुरु राहणार असल्याची माहिती उच्च शिक्षणमंत्री उदय सामंत यांनी दिली. त्यामुळे कॉलेज सुरु होणार असली तरी प्रत्यक्ष वर्ग उघडण्यासाठी आणि आपल्या मित्र परिवाराला भेटण्यासाठी विद्यार्थ्यांना पुढील सुचनेची वाट पाहावी लागणार आहे. कॉलेजमध्ये प्रत्यक्ष वर्ग सुरु करण्याबाबत करोनाची स्थिती पाहून निर्णय घेण्यात येणार आहे. जिल्हाधिकारी, जिल्ह्यातील आपत्ती व्यवस्थापन समितीशी चर्चा करुन कॉलेज प्रत्यक्ष उघडण्याबाबत निर्णय घेतला जाईल असे उदय सामंत म्हणाले. पण सध्याच्या परिस्थितीत ऑफलाइन वर्ग सुरु करणे ही रिस्क असल्याचेही ते म्हणाले. सर्वांनाच अद्याप COVID19 चा पहिला डोस मिळाला नाही. केवळ १७ ते १८ टक्के जणांनाच दुसरा डोस मिळाला आहे. जेव्हा संपूर्ण विद्यार्थ्यांचे दोन्ही डोस पूर्ण होतील त्यावेळी ऑफलाइन वर्ग सुरु केले जातील असे शिक्षणमंत्री यावेळी म्हणाले. कोविड सेंटर म्हणून अनेक वसतिगृह घेण्यात आली होती. जिल्हा प्रशासनाकडून त्याचा आढावा घेतला. अनेक वसतिगृह अद्यापही कोविड सेंटर म्हणून आहेत. त्यात करोना रुग्ण संख्या वाढते आहे. त्यामुळे नोव्हेंबरमध्ये आढावा घेऊनच कॉलेजचे प्रत्यक्ष वर्ग सुरू करण्याबाबतचा निर्णय घेतला जाईल असे ते म्हणाले. दरम्यान, देशात अनेक राज्यांमध्ये महाविद्यालये सुरू झाली आहेत किंवा सुरू होण्याच्या तयारीत आहेत. दिल्ली विद्यापीठात ५० टक्के क्षमतेसह १५ सप्टेंबरपासून वर्ग सुरू होणार आहेत. १५ सप्टेंबरपासून पदवी आणि पदव्युत्तर पदवीच्या अंतिम वर्षाच्या विद्यार्थ्यांसाठी ५० टक्के क्षमतेसह ग्रंथालय, प्रयोगशाळा, वर्ग खोली उघडण्याचे आदेश विद्यापीठाने दिले आहेत. केरळमध्येही तांत्रिक, पॉलिटेक्निक आणि मेडिकलसह सर्व उच्च शिक्षण संस्थांच्या अंतिम वर्षाच्या विद्यार्थ्यांसाठी ४ ऑक्टोबरपासून संस्था सुरू होणार आहेत.
from Career News in Marathi: Career News, मराठी Career बातम्या | Maharashtra Times https://ift.tt/3zd2NKK
via nmkadda