गणित कठीण, फिजिक्स, केमिस्ट्री सोपा; पहिल्या दिवसाची परीक्षा सुरळीत Rojgar News

म.टा. प्रतिनिधी, नागपूर इंजिनीअरिंग, फार्मसी आणि कृषी अभ्यासक्रमांच्या प्रथम वर्षाला प्रवेश घेण्यासाठी आवश्यक असलेल्या एमएचटी-सीईटीला सोमवारपासून प्रारंभ झाला. पहिल्या दिवशी पहिल्या सत्रात झालेल्या परीक्षेत गणिताचा पेपर कठीण, तर फिजिक्स आणि केमिस्ट्री हे पेपर सोपे गेल्याचे विद्यार्थ्यांनी सांगितले. राज्याच्या सीईटी सेलच्यावतीने ऑनलाइन पद्धतीने विद्यार्थ्यांची ही परीक्षा घेण्यात येते आहे. नागपुरात या परीक्षेकरिता १६ केंद्रे निश्चित करण्यात आली आहेत. यापैकी बहुतांश इंजिनीअरिंग कॉलेजे असून काही खासगी संस्थादेखील आहेत. विद्यार्थ्यांना परीक्षा केंद्रांवर जाऊन ऑनलाइन परीक्षा द्यायची आहे. १ ऑक्टोबरपर्यंत ही परीक्षा चालणार आहे. सकाळी ९ ते १२ आणि दुपारी २ ते ५ अशा दोन सत्रांमध्ये ही परीक्षा घेण्यात येते आहे. करोनामुळे यंदाही ही परीक्षा घेण्यास उशीर झाला आहे. या परीक्षेतील गुणांच्या आधारे राज्यातील निरनिराळ्या इंजिनीअरिंग कॉलेजांमध्ये प्रवेश घेता येणार आहे. फिजिक्स, केमिस्ट्री आणि बायोलॉजी व फिजिक्स, केमिस्ट्री आणि गणित अशा दोन गटांमध्ये ही परीक्षा होईल. बहुपर्यायी स्वरूपाचे तीन पेपर विद्यार्थ्यांना सोडवावे लागतील आणि प्रत्येक पेपर हा १०० गुणांचा असेल. या परीक्षेस निगेटिव्ह गुण पद्धतीचा वापर होणार नाही. दरम्यान, सीईटी सेलने नुकतेच विविध अभ्यासक्रमांचे वेळापत्रक आपल्या संकेतस्थळावर जाहीर केले आहे. त्यानुसार, १५ सप्टेंबरपासून या परीक्षा सुरू झाल्या आहेत.

from Career News in Marathi: Career News, मराठी Career बातम्या | Maharashtra Times https://ift.tt/2Zc2JyB
via nmkadda