Advertisement
PM Modi Speech on : ५ सप्टेंबरच्या शिक्षक दिनाच्या पार्श्वभूमीवर देशातील शिक्षक आणि विद्यार्थ्यांना संबोधित करणार आहेत. शिक्षकांच्या योगदानाचा सन्मान करण्यासाठी साजरा होणाऱ्या 'शिक्षण पर्व' दरम्यान पंतप्रधान नरेंद्र मोदी ७ सप्टेंबर रोजी शिक्षक, विद्यार्थी आणि शिक्षण क्षेत्रातील इतर योगदानकर्त्यांना मार्गदर्शन करतील अशी माहिती समोर येत आहे. मोदी या प्रसंगी पाच उपक्रमांचाही शुभारंभ करणार आहेत. ज्यात १०,००० शब्दांचा भारतीय सांकेतिक भाषा शब्दकोश, बोलकी पुस्तके (दृष्टिहीनांसाठी ऑडिओ पुस्तके), सीबीएसईची शालेय गुणवत्ता मूल्यांकन आणि मान्यता फ्रेमवर्क (SQAAF), NIPUN भारतसाठी NISTHA शिक्षक प्रशिक्षण कार्यक्रम आणि शाळेच्या विकासासाठी स्वयंसेवक, देणगीदार आणि सीएसआर योगदान देणाऱ्यांच्या सोयीसाठी विद्यांजली पोर्टल या उपक्रमांचा समावेश आहे. शिक्षकांचे मोलाचे योगदान आणि राष्ट्रीय शिक्षण धोरण (NEP)२०२० चे एक पाऊल पुढे नेण्यासाठी शिक्षण मंत्रालय (MoE) ५ ते १७ सप्टेंबर दरम्यान शिक्षक पर्व २०२१ साजरा करत आहे. शिक्षकांना राष्ट्रीय पुरस्कार देण्याची सुरुवात होणार आहे. शिक्षक दिनानिमित्त ४४ शिक्षकांना राष्ट्रीय पुरस्काराने सन्मानित केले जाणार आहे. या शिक्षकांचा ५ सप्टेंबरला म्हणजेच शिक्षक दिनी राष्ट्रपतींच्या हस्ते सन्मान केला जाणार आहे. सन्मानित करण्यात येणाऱ्या शिक्षकांमध्ये झारखंड, बिहार, बंगाल, ओडिशा, हरियाणा, हिमाचल प्रदेश, पंजाब, दिल्ली, राजस्थान, गुजरात, मध्य प्रदेश, जम्मू आणि काश्मीर, लडाख, उत्तर प्रदेश, छत्तीसगड, नागालँड, अरुणाचल प्रदेश, मणिपूर, सिक्कीम, मिझोराम, त्रिपुरा, आसाम, झारखंड, केरळ, आंध्र प्रदेश, तेलंगणा, कर्नाटक, तामिळनाडू, महाराष्ट्र आणि पुद्दुचेरी येथील शिक्षकांचा समावेश आहे. बहुतेक राज्यांमध्ये सुमारे ८० टक्के शिक्षक आणि शिक्षकेत्तर कर्मचाऱ्यांना करोनापासून संरक्षण देण्यासाठी लसीचा किमान एक डोस देण्यात आला आहे. तत्पूर्वी बुधवारी केंद्रीय शिक्षण मंत्री धर्मेंद्र प्रधान यांनी त्यांच्या विभागाच्या वरिष्ठ अधिकाऱ्यांसह देशभरात पुन्हा सुरू होणाऱ्या शाळांच्या स्थितीचा आढावा घेतला. सप्टेंबर महिन्यापर्यंत शाळांमधील सर्व अध्यापन आणि शिक्षकेतर कर्मचाऱ्यांचे लसीकरण करण्यासाठी त्यांनी रोड-मॅपचा आढावा घेतला. शाळा पुन्हा उघडल्या जात असताना सुरक्षित वातावरण कायम ठेवण्यासाठी भारत सरकार भारतातील शाळांमधील अध्यापन आणि शिक्षकेतर कर्मचाऱ्यांच्या लसीकरणाला प्राधान्य देत आहे. विविध राज्य सरकारे ही लसीकरणाबाबत शालेय शिक्षण आणि साक्षरता विभागाचे अधिकारी, शिक्षक आणि शिक्षकेतर कर्मचाऱ्यांच्या संपर्कात आहेत. कोरोना केसेसचे प्रमाण कमी झाल्याच्या पार्श्वभूमीवर दिल्ली, उत्तर प्रदेश, बिहार, मध्य प्रदेश, गुजरात, पंजाब, ओरिसा, राजस्थान, कर्नाटक, त्रिपुरा इत्यादीसह अनेक राज्यांमध्ये शाळा उघडल्या जात आहेत. विविध राज्य सरकारांनी वेगवेगळ्या तारखांपासून शाळा उघडण्याचा निर्णय घेतला आहे. असे असले तरीही विद्यार्थ्यांना शाळेत जाण्यावर सक्ती केली जात नाही. ५ सप्टेंबरला कार्यक्रमाच्या उद्घाटनापासून ते १७ सप्टेंबरपर्यंत वेबिनार, चर्चा आणि सादरीकरणे होणार आहेत. ज्यात देशातील विविध शाळांमधील शैक्षणिक अभ्यासकांना त्यांचे अनुभव कथन करण्यासाठी आमंत्रित केले गेले आहे. अगदी दुर्गम भागातील शाळांमधील शिक्षक आणि प्रयोगशील शाळेतील शिक्षक हे गुणवत्ता आणि नावीन्यपूर्ण विषयांवर बोलणार असल्याची माहिती अधिकाऱ्यांनी दिली आहे.
from Career News in Marathi: Career News, मराठी Career बातम्या | Maharashtra Times https://ift.tt/3zPaEj2
via nmkadda