.webp)
Advertisement
Mhada : महाराष्ट्र गृहनिर्माण व क्षेत्रविकास प्राधिकरण अर्थात म्हाडामधील भरतीसाठी अद्याप अर्ज केला नसेल तर तुमच्यासाठी महत्वाची बातमी आहे. म्हाडातर्फे देण्यात आलेल्या सुचनेनुसार अर्ज प्रक्रियेला आठवड्याची मुदतवाढ देण्यात आली आहे. म्हाडामधील विविध पदांच्या भरतीसाठी उमेदवारांकडून ऑनलाइन माध्यमातून अर्ज मागविण्यात आले. यासाठी १४ ऑक्टोबर ही मुदत देण्यात आली होती. तसेच परीक्षा शुल्क भरण्यासाठी १५ ऑक्टोबर ही मुदत देण्यात आली होती. पण आता म्हाडातर्फे नोटीस जाहीर करण्यात आली आहे. त्यानुसार उमेदवारांना २१ ऑक्टोबरपर्यंत ऑनलाइन अर्ज करता येणार आहे. तसेच २२ ऑक्टोबरपर्यंत अर्ज शुल्क भरता येणार आहे. म्हाडामध्ये विविध पदांच्या ५६५ रिक्त जागा भरल्या जाणार आहेत. या भरती अंतर्गत कार्यकारी अभियंता (स्थापत्य), उप अभियंता (स्थापत्य), मिळकत व्यवस्थापक/प्रशासकीय अधिकारी, सहायक अभियंता (स्थापत्य), सहायक विधी सल्लागार, कनिष्ठ अभियंता (स्थापत्य), कनिष्ठ वास्तुशास्त्रज्ञ सहायक, स्थापत्य अभियांत्रिकी सहाय्यक, सहाय्यक, वरिष्ठ लिपिक, कनिष्ठ लिपिक-टंकलेखक, लघुटंकलेखक, भूमापक, अनुरेखक या जागा भरल्या जाणार आहेत. रिक्त जागांचा तपशील कार्यकारी अभियंता (स्थापत्य)च्या १३ जागा, उप अभियंता (स्थापत्य)च्या १२ जागा, मिळकत व्यवस्थापक/प्रशासकीय अधिकारीच्या दोन जागा, सहाय्यक अभियंता (स्थापत्य)च्या ३० जागा, सहायक विधी सल्लागारच्या २ जागा, कनिष्ठ अभियंता (स्थापत्य)च्या ११९ जागा, कनिष्ठ वास्तुशास्त्रज्ञ सहायकच्या ६ जागा, स्थापत्य अभियांत्रिकी सहाय्यकच्या ४४ जागा, सहाय्यकच्या १८ जागा, वरिष्ठ लिपिकच्या ७३ जागा, कनिष्ठ लिपिक-टंकलेखकच्या २०७ जागा, लघुटंकलेखकच्या २० जागा, भूमापकच्या ११ जागा आणि अनुरेखक पदाच्या ७ जागा रिक्त आहेत. या रिक्त पदांसाठी १७ सप्टेंबर २०२१ पासून अर्ज प्रक्रिया सुरु झाली आहे. २१ ऑक्टोबरनंतर आलेल्या अर्जाचा विचार केला जाणार नाही. तसेच अर्ज करण्यापूर्वी उमेदवाराने नोटिफिकेशन काळजीपूर्वक वाचावे. पदभरतीचे पात्रता निकष समजून घेऊन त्यानंतर अर्ज करावा. अर्जामध्ये काही चूक आढळल्यास अर्ज बाद करण्यात येईल. पदभरतीमध्ये आरक्षित वर्गाला सरकारी नियमानुसार सवलत देण्यात येणार आहे. याचा सविस्तर तपशील म्हाडाची अधिकृत वेबसाइट https://mhada.gov या वेबसाइटवर जाहीर करण्यात आला आहे.
from Career News in Marathi: Career News, मराठी Career बातम्या | Maharashtra Times https://ift.tt/2X8tbbT
via nmkadda
