Advertisement
म. टा. प्रतिनिधी, नाशिक राज्य सामायिक प्रवेश परीक्षा कक्षामार्फत घेण्यात आलेल्या 'एमएचटी-सीईटी' या प्रवेश परीक्षेची उत्तरतालिका मंगळवारी जाहीर करण्यात येणार होती. परंतु, दिलेल्या सूचनेनुसार प्रक्रिया करूनही उत्तरतालिका मिळत नसल्यामुळे उत्तरतालिका नेमकी गेली कुठे, असा प्रश्न विद्यार्थ्यांना पडला आहे. बारावीच्या निकालानंतर इंजिनीअरिंग, फार्मसी आणि अॅग्रिकल्चरल अभ्यासक्रमांच्या प्रवेशासाठी विद्यार्थ्यांना मोठी प्रतीक्षा करावी लागली होती. ही परीक्षा झाल्यानंतर 'सीईटी' सेलने १३ ऑक्टोबरला उत्तरतालिका जाहीर करण्याबाबत माहिती दिली होती. त्यानुसार विद्यार्थ्यांना उत्तरतालिका डाऊनलोड करण्याची प्रक्रियाही सांगण्यात आली होती. सीईटी सेलच्या वेबसाइटवर जाऊन संबंधित पर्यायावर क्लिक करून आपली माहिती भरल्यानंतर अनेक विद्यार्थ्यांना 'इनव्हॅलिड यूजरनेम' अशी माहिती दिसत होती, तर काही विद्यार्थ्यांना माहिती भरल्यानंतरही उत्तरतालिका मिळत नव्हती. दुपारपर्यंत अनेक विद्यार्थ्यांना या तांत्रिक अडचणींचा सामना करावा लागला. दुपारनंतर सीईटी सेलच्या वेबसाइटवरून उत्तरतालिकेचा पर्यायच गायब झाल्याचे विद्यार्थ्यांच्या निदर्शनास आले. तसेच 'कँडिडेट लॉग इन' मधूनही उत्तरतालिका मिळत नसल्यामुळे, अनेक विद्यार्थी संभ्रमात होते. वेबसाइटवर विद्यार्थ्यांना तांत्रिक अडचणी उत्तरतालिका उपलब्ध करून दिल्यानंतर त्याबाबत काही हरकती असल्यास त्या नोंदविण्यासाठी विद्यार्थ्यांना १३ ऑक्टोबरपर्यंत मुदत देण्यात आली आहे. परंतु, अनेक विद्यार्थ्यांना उत्तरतालिका डाऊनलोड करण्यातच अडचणी येत असल्यामुळे, काही समस्या असल्यास त्या कशा नोंदवायच्या हा प्रश्नही या विद्यार्थ्यांसमोर आहे. बारावीच्या निकालापासून, सीईटी होईपर्यंत विद्यार्थ्यांना अनेक अडचणींना तोंड द्यावे लागले आहे. आताही अशाच तांत्रिक अडचणींमुळे अनेक विद्यार्थी त्रस्त आहेत.
from Career News in Marathi: Career News, मराठी Career बातम्या | Maharashtra Times https://ift.tt/3AIM6b6
via nmkadda