म. टा. प्रतिनिधी, पुणे गेल्या दीड वर्षांपासून प्रत्यक्ष वर्गात जाऊन शिक्षण घेण्याची वाट पाहणाऱ्या विद्यार्थ्यांना अखेर मंगळवारी कॉलेजमध्ये जाऊन शिकण्याची, मित्रांशी मनसोक्त गप्पा मारण्याची संधी मिळाली. पुण्यातील बहुतांश कॉलेज मंगळवारी सुरू झाले. राज्याच्या उच्च व तंत्रशिक्षण विभागाने विद्यापीठे, महाविद्यालये सुरू करण्याबाबत कोणताही निर्णय प्रसिद्ध केला नाही. त्यामुळे, पुणे जिल्ह्यातील कॉलेज मंगळवारी सुरू होण्यात अडथळा निर्माण झाला होता. या प्रकारामुळे कॉलेज, विद्यापीठे सुरू करण्याच्या उपमुख्यमंत्री अजित पवार यांच्या आदेशाला उच्च व तंत्रशिक्षण विभाग गांभीर्याने घेत नसल्याचीही चर्चा होती. प्राध्यापक, प्राचार्य आणि विद्यार्थ्यांमध्ये संभ्रमाचे वातावरण होते. पण, सकाळी कॉलेज सुरू झाल्याने विद्यार्थ्यांनी सुटकेचा नि:श्वास टाकला. गेल्या वर्षी पहिल्या लाटेनंतर काही दिवस कॉलेज सुरू झाले; पण रुग्णांची संख्या वाढल्याने लगेच बंद पडले. यामुळे दीड वर्षापासून घरात बसून ऑनलाइन शिक्षणाला कंटाळलेल्या विद्यार्थ्यांनी समाधान व्यक्त केले. प्रत्यक्ष महाविद्यालयांमध्ये जाऊन शिक्षण घेण्याची संधी मिळाल्याने या विद्यार्थ्यांनी आनंद व्यक्त केला. कॉलेजमधील प्राध्यापकांनीही विद्यार्थ्यांचे स्वागत करत दीड वर्षांच्या प्रदीर्घ कालावधीनंतर प्रत्यक्ष अध्यापनाला सुरुवात केली. शहरातील बहुतांश कॉलेजमध्ये अकरावीपासून पदवीच्या प्रथम वर्षांचे वर्ग सुरू झाले. कॉलेज पुन्हा सुरू झाल्याने विद्यार्थ्यांनी समाधान व्यक्त केले असून यापुढे ऑफलाइन शिक्षणच सुरू राहावे, अशी अपेक्षा त्यांनी 'महाराष्ट्र टाइम्स'कडे व्यक्त केली आहे. राज्यातील ग्रामीण भागात पाचवी ते बारावीच्या शाळा, तर शहरी भागात आठवी ते बारावीच्या शाळा उत्साहात सुरू झाल्यानंतर उपमुख्यमंत्री अजित पवार यांनी ११ ऑक्टोबरपासून पुणे जिल्ह्यातील विद्यापीठे, कॉलेज सुरू होतील, असा निर्णय जाहीर केला. त्यानुसार पुणे महापालिकेने 'महाराष्ट्र बंद'च्या पार्श्वभूमीवर मंगळवारपासून महाविद्यालये, विद्यापीठे सुरू करण्याबाबतचे परिपत्रक प्रसिद्ध केले. मात्र, उच्च व तंत्रशिक्षण विभागाने महाविद्यालये, विद्यापीठे सुरू करण्याबाबत कोणताही निर्णय प्रसिद्ध केलेला नाही. त्यामुळे राज्याच्या उच्च शिक्षण संचालनालयाला पुणे विद्यापीठासोबत इतर अकृषी विद्यापीठांना आदेश देता येत नसल्याचे अधिकाऱ्यांनी सांगितले. पुणे विद्यापीठाच्या प्रशासनाला उच्च व तंत्रशिक्षण विभाग किंवा उच्च शिक्षण संचालनालयाचे कॉलेज सुरू करण्याबाबत कोणतेही आदेश मिळाले नाहीत. त्यामुळे विद्यापीठालाही संलग्न कॉलेज सुरू होण्यासाठी नियमावली प्रसिद्ध करता येत नसल्याचे चित्र होते. उपमुख्यमंत्री अजित पवार यांनी पुणे जिल्ह्यातील महाविद्यालये सुरू करण्याचे आदेश दिले. त्यानंतर उच्च व तंत्रशिक्षण विभागाचे लेखी आदेश अद्याप प्राप्त झालेले नाहीत. ते आदेश आल्यानंतर राज्यातील विद्यापीठे व महाविद्यालयांना त्या अनुषंगाने आवश्यक कार्यवाही करण्याच्या सूचना देण्यात येतील. - डॉ. धनराज माने, संचालक, उच्च शिक्षण संचालनालय खासगी विद्यापीठे सुरू होणार? पुणे जिल्ह्यात खासगी विद्यापीठे आणि स्वायत्त महाविद्यालये आहेत. पुणे स्थानिक प्रशासनाचे आदेश असल्याने, ही विद्यापीठे आणि महाविद्यालये आज मंगळवारी सुरू होऊ शकतात. त्यासाठी आवश्यक तयारी करण्यात आली आहे. त्यामुळे मंगळवारपासून महाविद्यालये आणि विद्यापीठे सुरू होतात का, हे पाहणे उत्सुकतेचे ठरणार आहे.
from Career News in Marathi: Career News, मराठी Career बातम्या | Maharashtra Times https://ift.tt/3FGZAHX
via nmkadda
0 टिप्पण्या