.webp)
Advertisement
Maharashtra 2021: राज्यभरातील महाविद्यालये साधारण दीड वर्षांच्या कालावधीनंतर आजपासून सुरु झाली आहेत. कॉलेजमध्ये करोना प्रतिंबध नियमांचे काटेकोरपण पालन केले जात आहे. दोन्ही डोस घेतलेल्या विद्यार्थ्यांना कॉलेजमध्ये प्रवेश देण्यात येतोय. शिक्षक आणि शिक्षकेत्तर कर्मचाऱ्यांनी देखील लशीचे दोन्ही डोस पूर्ण केलेयत याची काळजी घेतली जातेय. मास्क, सोशल डिस्टन्सिंग पाळून राज्यभरात विद्यार्थ्यांचे ऑफलाइन वर्ग सुरु झाले आहेत. उच्च व तंत्र उदय सामंत यांनी आगळ्यावेगळ्या पद्धतीने विद्यार्थ्यांना शुभेच्छा दिल्या आहेत. आजपासून राज्यातील कॉलेज सुरू होत आहेत.. सर्व विद्यार्थी मित्र मैत्रिणींना हार्दिक शुभेच्छा..."मंजिले उन्हीको मिलती है, जिनके सपनोंमे जान होती है ..युही पंख होनेसे कुछ भी नही होता 'हौसलो से उडान होती है .. असे म्हणत शिक्षणमंत्री उदय सामंत यांनी विद्यार्थ्यांना प्रोत्साहन दिले आहे. करोना आणि लॉकडाउनमुळे शैक्षणिक वर्ष २०२०-२१ पूर्णत: ऑनलाइन पद्धतीने राबविण्यात आले. करोना तिसऱ्या लाटेच्या भीतीमुळे शैक्षणिक वर्ष २०२१-२२ ही ऑनलाइन होते ती काय, अशी शक्यता निर्माण झाली होती. परंतु, गेल्या दोन महिन्यांपासून करोना संसर्ग आटोक्यात असल्यामुळे, तसेच १८ वर्षांवरील लसीकरणाचे प्रमाणही गेल्या काही महिन्यांत वाढल्यामुळे उच्च व तंत्रशिक्षण विभागामार्फत २० ऑक्टोबरपासून महाविद्यालये सुरू करण्याचा निर्णय घेण्यात आला आहे. करोना संसर्गाच्या पार्श्वभूमीवर विद्यापीठांनी सूचना जारी करून सुरक्षेसंदर्भात निर्देश दिले आहेत. महाराष्ट्र शासनाच्या उच्च व तंत्र शिक्षण विभागाच्या परिपत्रकानुसार महाविद्यालयातील नियमित वर्ग सुरू करण्यासाठी परवानगी देण्यात आली आहे. विद्यापीठाशी संलग्नित महाविद्यालये, मॉडेल डिग्री कॉलेज तसेच स्वायत्त महाविद्यालये सुरू होतील. महाविद्यालय सुरू करण्यापूर्वी संपूर्ण इमारत सॅनिटाइज करण्यात आल्या आहेत. एका तुकडीसाठी विद्यार्थी प्रवेश क्षमतेच्या ५० टक्के मर्यादा निश्चित करण्यात आली असून उर्वरित विद्यार्थ्यांना ऑनलाइन व्यवस्था राहील. - १८ वर्षांपेक्षा कमी वयाच्या विद्यार्थ्यांना ऑनलाइन सोय - दोन लशी घेतलेल्यांना महाविद्यालयात प्रवेश - एका बाकावर केवळ एकाच विद्यार्थ्याला बसविणार - प्रत्येकाला मास्क, सॅनिटायजर व सुरक्षित अंतर राखणे आवश्यक - नियमांचे उल्लंघन करणाऱ्यांवर कायदेशीर कार्यवाही होणार वसतिगृहात एका खोलीत एकच विद्यार्थी अध्यापनाचा वेळ ४५ मिनिटांचा राहणार आहे. तरीही महाविद्यालय सुरू ठेवण्याची वेळ त्यांच्या स्तरावर निश्चित करण्याचे आदेशात म्हटले आहे. क्रीडाविषयक परवानगी दिली जाणार नाही. वसतिगृहामध्ये एका खोलीत एक विद्यार्थी, विद्यार्थिनीची व्यवस्था राहील. वसतिगृहाची खोली मोठी असल्यास दोघांना परवानगी असणार आहे. वसतिगृहाच्या मेसमध्ये जेवणाच्या वेळा वेगवेगळ्या ठेवण्याचे आदेशात स्पष्ट करण्यात आले आहे. मुंबई विद्यापीठाच्या महाविद्यालयांना सूचना कॉलेजांचे वर्ग सुरू करताना मुंबई विद्यापीठातर्फे संलग्न महाविद्यालयांना सूचना जाहीर करण्यात आल्या आहेत. त्यानुसार ५० टक्के किंवा त्यापेक्षा जास्त क्षमतेने सुरू करताना करोनाच्या आजाराचा स्थानिक पातळीवरील प्रादुर्भाव व स्थानिक परिस्थिती, प्रतिबंधित प्रक्षेत्रांचे नियोजन व आरोग्यविषय पायाभूत सुविधांची उपलब्धता या बाबी विचारात घेण्यात याव्यात. तसेच कॉलेजे सुरू करण्यासंदर्भात स्थानिक प्राधिकरणांशी विचारविनिमय करून कॉलेजांनी त्यांच्या स्तरावर निर्णय घ्यावा, आदी सूचना विद्यापीठाने परिपत्रकामध्ये दिल्या आहेत.
from Career News in Marathi: Career News, मराठी Career बातम्या | Maharashtra Times https://ift.tt/3CaBwuE
via nmkadda
