Advertisement
म. टा. प्रतिनिधी, नाशिक महाराष्ट्र आरोग्य विज्ञान विद्यापीठामार्फत विविध वैद्यकीय अभ्यासक्रमांच्या परीक्षांना मंगळवारपासून (१२ ऑक्टोबर) सुरुवात झाली आहे. राज्यातील १७७ परीक्षा केंद्रांवर या परीक्षा आयोजित करण्यात आल्या असून, ४६ हजार विद्यार्थी या परीक्षा देणार असल्याची माहिती विद्यापीठाच्या परीक्षा विभागामार्फत देण्यात आली. विद्यापीठामार्फत उन्हाळी सत्र २०२१ च्या तिसऱ्या टप्प्यातील परीक्षांचा यामध्ये समावेश आहे. १२ ऑक्टोबर ते १ नोव्हेंबरदरम्यान या परीक्षा सुरू राहणार असून, सर्व पदवी अभ्यासक्रमांच्या प्रथम, द्वितीय व तृतीय वर्षाच्या परीक्षा १९ दिवसांमध्ये होणार आहेत. याचसोबत 'बॅचलर इन पॅरामेडिकल टेक्नॉलॉजी' व 'सर्टिफिकेट कोर्स इन मॉडर्न फार्मकोलॉजी' या विषयांच्या परीक्षाही या वेळी होणार आहेत. सकाळ व दुपार अशा दान सत्रांमध्ये या परीक्षा होणार असल्याचे परीक्षा विभागामार्फत सांगण्यात आले. यापूर्वीच्या दोन टप्प्यांमध्ये 'उन्हाळी सत्र २०२१' च्या परीक्षा आयोजित करण्यात आल्या होत्या. १६ ते २३ ऑगस्टदरम्यान सर्व पदव्युत्तर अभ्यासक्रमांच्या सर्व वर्षांच्या परीक्षा, सुपरस्पेशलिटी अभ्यासक्रमाच्या परीक्षा, तसेच अंतिम वर्ष एमबीबीएस अभ्यासक्रमाच्या परीक्षा घेण्यात आल्या. २३ सप्टेंबर ते ८ ऑक्टोबर या कालावधीत सर्व पदवी अभ्यासक्रमांच्या अंतिम वर्षाच्या परीक्षांचे आयोजन करण्यात आले होते. या परीक्षांचे सविस्तर वेळापत्रक विद्यापीठाच्या www.muhs.ac.in या वेबसाइटवर उपलब्ध करून देण्यात आले आहे. होमिओपॅथीच्या वेळापत्रकात बदल होमिओपॅथी विद्याशाखेच्या प्रथम, द्वितीय व तृतीय वर्षाच्या परीक्षेत प्रशासकीय कारणास्तव बदल करण्यात आल्याचे विद्यापीठाने जाहीर केले आहे. प्रवेश नियामक प्राधिकरणाच्या मान्यतेअभावी परीक्षेस बसू न शकणाऱ्या विद्यार्थ्यांच्या पात्रतेसाठी १३ ऑक्टोबरला मुंबई येथे प्रवेश नियामक प्राधिकरणाची बैठक आयोजित करण्यात आली आहे. त्यामुळे या वेळापत्रकात बदल करण्यात आला असून, या बदलाची माहिती विद्यापीठाच्य अधिकृत वेबसाइटवर उपलब्ध करून देण्यात आली आहे.
from Career News in Marathi: Career News, मराठी Career बातम्या | Maharashtra Times https://ift.tt/3DBCvo7
via nmkadda