Advertisement
म. टा. प्रतिनिधी, पुणे सावित्रीबाई फुले विद्यापीठात प्रवेश घेतलेल्या विद्यार्थ्यांना राहण्यासाठी वसतिगृहे सुरू करण्याच्या प्रक्रियेला सुरुवात करण्यात आली आहे. सोमवारपासून वसतिगृहांच्या खोल्यांचे वाटप केले जाणार असून, राज्याच्या उच्च व तंत्रशिक्षण विभागाचे आदेश मिळाल्यानंतर विद्यार्थ्यांना खोल्यांचा ताबा देण्यात येईल, असे विद्यापीठ प्रशासनाकडून स्पष्ट करण्यात आले आहे.करोनामुळे गेल्या दीड वर्षापासून विद्यापीठातील वसतिगृह बंद आहे. करोनाचा प्रादुर्भाव कमी झाल्याने लवकरच सुरू करण्याचा निर्णय होण्याची शक्यता आहे. ही शक्यता गृहित धरून विद्यापीठाने वसतिगृहाच्या खोल्या वाटपांची प्रक्रिया सुरू केली आहे. ज्या विद्यार्थ्यांनी विद्यापीठात प्रवेश घेतला आहे, अशा विद्यार्थ्यांना सोमवारपासून खोल्यांचे वाटप केले जाणार आहे. विद्यापीठाच्या नियमानुसार खोली वाटपाची प्रक्रिया ऑनलाइन होणार आहे. करोना काळात रुग्णांच्या उपचारासाठी विलगीकरण कक्ष म्हणून वसतिगृहांचा वापर करण्यात आला होता. विद्यापीठाने वसतिगृहांच्या सर्व खोल्यांमध्ये स्वच्छता आणि सॅनिटायझेशनची प्रक्रिया पूर्ण केली आहे. आता उच्च व तंत्रशिक्षण विभागाच्या सहसंचालकांच्या निर्देशानुसार टप्प्याटप्प्याने वसतिगृहे सुरू करण्यात येणार आहेत. वसतिगृहे बंद असल्यामुळे गेल्या अनेक महिन्यांपासून विद्यापीठात संशोधन करणाऱ्या विद्यार्थ्यांना अनेक अडचणींचा सामना करावा लागत होता. आता महाविद्यालयांबरोबच विद्यापीठांमधील विभागही सुरू केले जात असल्याने विद्यापीठातील वसतिगृहे सुरू करावीत, अशी मागणी विद्यार्थी संघटना करीत आहेत. त्यांना प्रतिसाद देऊन वसतिगृहांच्या खोल्यांचे वाटप करण्याचा निर्णय विद्यापीठ प्रशासनाने घेतला आहे. वसतिगृहाच्या दुरुस्तीची कामे जवळपास पूर्ण झाली आहेत. सोमवारपासून विद्यार्थ्यांना वसतिगृहांमधील खोल्यांचे नियमावलीप्रमाणे ऑनलाइन पद्धतीने वाटप होईल. सरकारच्या आदेशानंतर विद्यार्थ्यांना खोलीचा ताबा दिला जाईल आणि त्यांना राहण्यासाठी परवानगी दिली जाईल. या प्रक्रियेच्या पहिल्या टप्प्यामध्ये ५० टक्के विद्यार्थ्यांचे प्रवेश निश्चित करण्यात येणार आहेत. - डॉ. प्रफुल्ल पवार, कुलसचिव, सावित्रीबाई फुले पुणे विद्यापीठ
from Career News in Marathi: Career News, मराठी Career बातम्या | Maharashtra Times https://ift.tt/3Cb8BWI
via nmkadda