.webp)
Advertisement
म. टा. प्रतिनिधी, पुणे महाराष्ट्र लोकसेवा आयोगावर (एमपीएससी) पूर्ण सदस्यांची नेमणूक होऊन, पदभरती प्रक्रियेला चालना कधी मिळेल, असा प्रश्न स्पर्धा परीक्षांची तयारी करणाऱ्या उमेदवारांना पडला आहे. आयोगावर दोन सदस्यांची पदे रिक्त असतानाच, आणखी एक सदस्य दयानंद मेश्राम नुकतेच निवृत्त झाले. त्यामुळे पुन्हा तीन पदे रिक्त झाली आहे. अध्यक्षाचा अतिरिक्त कार्यभार सध्या देवानंद शिंदे यांच्याकडे आहे, त्यामुळे या तीन रिक्त जागा कधी भरणार, असा प्रश्न उपस्थित होत आहे. एमपीएससीद्वारे विविध सरकारी पदांवर भरती प्रक्रिया राबविण्यासाठी परीक्षेच्या पूर्व, मुख्य आणि मुलाखत अशा टप्प्यांनुसार होते. त्यानंतर अंतिम निकाल जाहीर होऊन, पदांसाठी उमेदवारांच्या नावांची शिफारस राज्य सरकारच्या विभागांकडे पाठविण्यात येते. पदभरती प्रक्रियेत मुलाखतीचा टप्पा महत्त्वाचा असून, त्याची जबाबदारी सदस्यांच्या पॅनेलकडे असते. एमपीएससीची संरचना एक अध्यक्ष आणि पाच सदस्यांनी आहे. मात्र गेल्या काही वर्षांपासून सदस्य संख्यापूर्ती झालेली नाही. एमपीएससीमध्ये चार सदस्यांची पदे रिक्त होती. अपुऱ्या मनुष्यबळामुळे पदभरती प्रक्रियेला विलंब होत असल्याचे वेळोवेळी निष्पन्न झाले. त्यामुळे सदस्यांच्या रिक्त पदांवर तातडीने सदस्यांची नेमणूक करण्याची मागणी उमेदवारांसोबतच लोकप्रतिनिधींनी केली होती. त्यानंतर राज्य सरकारने काही दिवसांपूर्वी एमपीएसीवर दोन सदस्यांची नियुक्ती केली. मात्र, दोन सदस्यांच्या नियुक्त्या जाहीर केल्या नाहीत. ही परिस्थिती असतानाच आता एमपीएससीचे सदस्य दयानंद मेश्राम निवृत्त झाले. त्यामुळे एमपीएससीची धुरा प्रभारी अध्यक्ष देवानंद शिंदे तसेच सदस्य डॉ. प्रताप दीघावकर आणि राजीव जाधव यांच्यावर आहे. तीन सदस्यांची पदे अजूनही रिक्त आहे. अशा परिस्थितीत रिक्त पदांवर तातडीने सदस्यांच्या नेमणुका करून, भरती प्रक्रियेला चालना द्यावी, अशी मागणी उमेदवारांच्या वतीने पुढे आली आहे. याबाबत अधिक माहितीसाठी एमपीएससीच्या सचिव स्वाती म्हसे पाटील यांच्याशी संपर्क साधला असता, तो होऊ शकला नाही. निकालांना उशीर? एमपीएससीकडून पीएसआय आणि स्थापत्य अभियांत्रिकीच्या पदांसाठी मुलाखत प्रक्रिया पूर्ण करण्यात येणार आहे. या दोन्हींसाठी अनेक उमेदवारांची निवड झाली आहे. एमपीएससीच्या पॅनेलवर पूर्ण सदस्य असल्यास, ही प्रक्रिया कमी कालावधीत पूर्ण होऊ शकते. मात्र, एक प्रभारी अध्यक्ष आणि दोन सदस्यांच्या पॅनेलमुळे मुलाखतीची प्रक्रिया रेंगाळण्याची शक्यता आहे. त्यामुळे पदभरतीचा अंतिम निकाल जाहीर होण्यास विलंब होण्याची शक्यता आहे. त्याचप्रमाणे आगामी काळात राज्यसेवा परीक्षेची प्रक्रिया होणार असल्याने, एमपीएससीचे पॅनेल पूर्ण व्हावे, अशी अपेक्षा व्यक्त करण्यात येत आहे. राज्य सरकारने जाहीर केल्याप्रमाणे एमपीएससीवर पूर्ण सदस्यांच्या नियुक्त्या अजूनही झालेल्या नाहीत. सध्या तीन सदस्यांची पदे रिक्त असल्याने पदभरती प्रक्रिया राबविण्यास विलंब होणार आहे. केरळ लोकसेवा आयोगाच्या धर्तीवर, बारा सदस्यांच्या नियुक्त्या एमपीएससीवर करण्यात येईल, असे सरकारने जाहीर केले होते. त्यानुसार तातडीने पावले उलचून मंत्रिमंडळाच्या बैठकीत निर्णय घ्यावा. - महेश बडे, एमपीएससी स्टुडन्ट राइट्स
from Career News in Marathi: Career News, मराठी Career बातम्या | Maharashtra Times https://ift.tt/3EOKChI
via nmkadda
