NEET PG: आरक्षण बदलामुळे प्रवेशात चढाओढ; वैद्यकीय पदव्युत्तर पदवीच्या जागांची गणिते बदलली

NEET PG: आरक्षण बदलामुळे प्रवेशात चढाओढ; वैद्यकीय पदव्युत्तर पदवीच्या जागांची गणिते बदलली

म. टा. विशेष प्रतिनिधी, मुंबई वैद्यकीय अभ्यासक्रमाच्या पदव्युत्तर पदवी अभ्यासक्रमांमध्ये () केंद्रीय कोट्यात आता २७ टक्के ओबीसी (OBC) आणि १० टक्के आर्थिकदृष्ट्या मागास प्रवर्गाला (EWS) असलेले आरक्षण लागू करण्यात आले आहे. यामुळे या शैक्षणिक वर्षात पदव्युत्तर पदवी अभ्यासक्रमांमध्ये प्रवेशासाठी चुरस पाहायला मिळणार आहे. पदव्युत्तर पदवी वैद्यकीय अभ्यासक्रमांच्या जागांचा तक्ता वैद्यकीय प्रवेश समितीने जाहीर केला आहे. यामध्ये खुल्या प्रवर्गातील जागा गतवर्षीच्या तुलनेत ४२ टक्क्यांनी घटल्या आहेत. २०२०मध्ये केंद्रीय कोट्यामध्ये खुल्या प्रवर्गात ६ हजार ५५६ जागा होत्या. ती संख्या २०२१मध्ये तीन हजार ८०९वर आली आहे. वैद्यकीय पदव्युत्तर पदवी अभ्यासक्रमाच्या प्रवेशासाठी रुग्णालयांमध्ये ज्या जागा आहेत, त्यापैकी ५० टक्के जागा या नियमांनुसार केंद्रीय कोट्यासाठी राखीव ठेवाव्या लागतात. या जागांवर आतापर्यंत अनुसुचित जाती आणि जमाती प्रवर्गासाठीचे आरक्षण होते. इतर सर्व जागा खुल्या प्रवर्गातून भरल्या जात होत्या. याबाबत केंद्र सरकारने अध्यादेश आणून २७ टक्के ओबीसी आणि १० टक्के आर्थिकदृष्ट्या मागास प्रवर्गाला असलेले आरक्षण लागू केले. यामुळे काही अभ्यासक्रमांमध्ये खुल्या प्रवर्गासाठी जागाच शिल्लक राहणार नसल्याचा आक्षेप घेत सर्वोच्च न्यायालयात याचिका दाखल करण्यात आली होती. या याचिकेची सुनावणी घेताना या प्रक्रियेवर स्थगिती आणण्यात आली होती. मात्र शैक्षणिक वर्ष संपत आले तरी प्रवेश प्रक्रिया पूर्ण न झाल्याने डॉक्टरांनी देशभर आंदोलन केले होते. तेव्हा सर्वोच्च न्यायालयाने यावर्षी प्रवेशासाठी हा अध्यादेश लागू करण्याचे सांगत प्रवेश प्रक्रिया पूर्ण करण्यास सांगितले होते आणि पुढील सुनावणी मार्च महिन्यात ठेवली. यानुसार प्रवेश समितीने जागांचा तक्ता जाहीर केला आहे. यात यंदा केंद्रीय कोट्यातून प्रवेशासाठी चुरस पाहावयास मिळणार आहे. तर अनेक सार्वजनिक वैद्यकीय कॉलेजांमध्ये ज्या अभ्यासक्रमांसाठी एक आकडी जागा आहेत, तेथे निम्म्या जागा केंद्रीय कोट्यात जाणार असून खुल्या प्रवर्गासाठी आता जागाच नसतील, असेही चित्र आहे. तर काही जागांवर फिरते आरक्षण असल्याने प्रत्येक प्रवर्गातील विद्यार्थ्याला प्रवेशासाठी दोनपेक्षा जास्त काळ प्रतीक्षा करावी लागणार आहे. एखाद्या अभ्यासक्रमासाठी चार जागा असतील तर त्यातील दोन जागा केंद्रीय कोट्यासाठी राखीव होत होत्या. यामध्ये एक जागा खुल्या प्रवर्गातील असेल, असे स्पष्ट होत असे. मात्र आता या जागांवर फिरते आरक्षण लागू करावे लागेल आणि त्यानुसार विद्यार्थ्यांचे प्रवेश होतील. त्यामुळे एक वर्ष या जागेवर १०० टक्के आरक्षण असेल तर दुसऱ्या वर्षी यातील एक जागा खुल्या प्रवर्गासाठी वापरता येतील, असे वैद्यकीय शिक्षण आणि संशोधन संचालनालयाचे माजी संचालक डॉ. प्रवीण शिनगारे यांनी सांगितले. तर यावर्षीची प्रवेशप्रक्रिया सर्वोच्च न्यायालयाच्या निर्णयानुसार होईल. मात्र आता विद्यार्थ्यांच्या हातात गुण आहेत, मात्र जागा घटल्या आहेत असे चित्र असल्याचे 'सेव्ह मेरिट'च्या सुधा शेणॉय यांनी सांगितले. या नव्या बदलामुळे कटऑफ वाढू शकतील, असेही त्या म्हणाल्या. खुल्या प्रवर्गातील जागा अभ्यासक्रम --२०२० -- २०२१ --कमी झालेल्या जागा एमडी मेडिसीन --७३६ --३९४-- ३४२ बालरोगतज्ज्ञ --४७५ --२९५ --१८० ओबीजी-- ६१२ --३३५-- २७७ एमएस सर्जन--६४१ --३८४ --२५७ ईएनटी --२०९ --११७--९२ एकूण जागा --६५५६ --३८०९ --२७४७


source https://maharashtratimes.com/career/career-news/neet-pg-counselling-2021-over-42-percent-seats-in-open-decreased-due-to-ews-obc-quota/articleshow/88910058.cms

0 Response to "NEET PG: आरक्षण बदलामुळे प्रवेशात चढाओढ; वैद्यकीय पदव्युत्तर पदवीच्या जागांची गणिते बदलली"

टिप्पणी पोस्ट करा

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel