TICKER

6/recent/my%20zone

Header Ads Widget

Responsive Advertisement

NEET UG: एमबीबीएस, बीडीएसच्या प्रवेशासाठी पुन्हा मुदतवाढ

म. टा. विशेष प्रतिनिधी, मुंबई राज्यात एमबीबीएस, बीडीएस प्रवेशासाठीची यंदा मागील वर्षीपेक्षा कमी नोंदणी झाल्याचे समोर आले असून सीईटी सेलकडून मुदतवाढ देऊनही केवळ ५७ हजार ४९५ विद्यार्थ्यांनी पूर्ण शुल्क भरून नोंदणी प्रक्रिया पूर्ण केली आहे. सीईटी सेलच्या माहितीनुसार, प्राथमिक नोंदणी प्रक्रिया केलेल्या विद्यार्थ्यांची संख्या ६१ हजार ४८१ आहे. नोंदणीसाठी विद्यार्थ्यांना सीईटी सेलकडून १७ जानेवारीपर्यंत मुदतवाढ देण्यात आली आहे. यंदा वैद्यकीय पदवी अभ्यासक्रमाच्या प्रवेशाच्या दुसऱ्या टप्प्यापर्यंत झालेल्या नोंदणीवरून नोंदणी अर्जांत ७ ते ८ हजार अर्जांची घट दिसून आली आहे. मागील वर्षी एमबीबीएस, बीडीएस आणि इतर पदवी अभ्यासक्रमांसाठी ६४ हजार विद्यार्थ्यांनी नोंदणी केली होती. यंदा वैद्यकीय पदवी अभ्यासक्रमाच्या प्रवेशाची पहिली तात्पुरती गुणवत्ता यादी १३ जानेवारी रोजी प्रदर्शित करण्यात येणार होती. मात्र आवश्यक ती कागदपत्रे जमा करण्यास विलंब लागत असल्याने, तसेच अनेक विद्यार्थ्यांना अर्ज भरताना झालेल्या चुका दुरुस्त करायच्या असल्याने अर्ज भरण्यासाठी मुदतवाढ मागितली जात होती. या पार्श्वभूमीवर हित लक्षात घेऊन मुदतवाढ देण्यात आल्याची माहिती सीईटी सेलकडून जाहीर करण्यात आली आहे. विद्यार्थ्यांना १७ जानेवारीपर्यंत आपली प्रमाणपत्रे, आवश्यक कागदपत्रे जमा करायची असल्याचे स्पष्ट करण्यात आले. यंदा मुंबई आणि मुंबई उपनगर जिल्ह्यातून सर्वाधिक ४ हजार ९६३ विद्यार्थ्यांनी शुल्क भरून नोंदणी प्रक्रिया पूर्ण केली. त्याखालोखाल पुण्यातून ४ हजार ६५६ विद्यार्थ्यांची प्रक्रिया पूर्ण झाली आहे. नंतर नगर जिल्ह्यातून ४ हजार ४५ विद्यार्थ्यांनी प्रक्रिया पूर्ण केली आहे. आता मुदतवाढ दिल्यामुळे यामध्ये आणखी वाढ होण्याची शक्यता व्यक्त होत आहेत. राज्यात सर्वांत कमी २६१ अर्ज हे गडचिरोली जिल्ह्यातून आले आहेत. कोटा पॅटर्न नगर जिल्ह्यातून प्रथमच चार हजारांच्या वर अर्ज आले आहेत. या भागात खासगी कोचिंग क्लासनी कोटा येथील क्लाससोबत सहकार्य करून शिकवणी वर्ग सुरू केल्याचा हा परिणाम म्हणता येईल, असे राज्याचे आरोग्य शिक्षण आणि संशोधन संचालनालयाचे माजी संचालक डॉ. प्रवीण शिनगारे यांनी सांगितले. यापूर्वी या विद्यार्थ्यांना औरंगाबाद, पुणे येथे जाऊन बारावी आणि स्पर्धा परीक्षांचे शिक्षण घ्यावे लागत होते. आता जिल्हास्तरावर प्रशिक्षण सुरू झाल्यामुळे विद्यार्थ्यांना फायदा होत असल्याचेही ते म्हणाले. तर गडचिरोली येथे विद्यार्थ्यांना आजही जिल्ह्याबाहेर जाऊन शिक्षण घ्यावे लागते. यामुळे तेथील अर्ज करणाऱ्या विद्यार्थ्यांचा आकडा कमी असल्याचे निरीक्षण त्यांनी नोंदवले.


source https://maharashtratimes.com/career/career-news/maharashtra-neet-ug-2021-counselling-registration-date-extended-to-january-17/articleshow/88910337.cms

टिप्पणी पोस्ट करा

0 टिप्पण्या