टीईटी प्रमाणपत्रांची पडताळणी सुरू

Advertisement

म. टा. प्रतिनिधी, पुणे (टीईटी) २०१९-२० मध्ये पैसे देऊन पात्र ठरलेल्या सात हजार ८०० उमेदवारांच्या प्रमाणपत्रांची पोलिस व शिक्षण विभागाकडून पडताळणी सुरू करण्यात आली आहे. याबाबतची सर्व माहिती पोलिसांनी शिक्षण विभागाला दिली आहे. त्यानुसार शिक्षण विभागाने पुढील कार्यवाहीला सुरुवात केल्याची माहिती सूत्रांनी दिली. त्यामुळे आर्थिक देवघेव करून प्रमाणपत्र मिळवल्यानंतर शिक्षक म्हणून नोकरी करणाऱ्या बोगस उमेदवारांचे धाबे दणाणले आहेत. पुणे सायबर सेल पोलिसांनी टीईटी परीक्षेचा गैरव्यवहार उघडकीस आणला होता. या प्रकरणात तपास करत असताना २०१९-२० च्या टीईटी परीक्षेत एकूण १६ हजार ५९२ परीक्षार्थ्यांना पात्र केल्याचे दिसून आले. प्रत्यक्षात पोलिसांनी दोन्ही निकाल पडताळून पाहिल्यावर त्यातील सात हजार ८०० परीक्षार्थी अपात्र असतानाही त्यांना निकालामध्ये पात्र ठरविण्यात आल्याचे दिसून आले आहे. यासाठी आरोपींनी उमेदवरांना पात्र करण्यासाठी तीन पद्धतीचा वापर केल्याचे दिसून आले होते. त्यामध्ये उमेदवरांच्या ओएमआर शीटमध्ये फेरफार, गुण वाढवून देणे आणि थेट प्रमाणपत्र दिल्याचे आढळून आले होते. पात्र नसताना पैसे घेऊन पात्र असल्याचे प्रमाणपत्र मिळविलेल्या सात हजार ८०० जणांची यादी पुणे सायबर पोलिसांनी शिक्षण विभागाला दिली आहे. या यादीनुसार आता शिक्षण विभाग पोलिसांच्या मदतीने या सर्वांच्या प्रमाणपत्राची पडताळणी करणार आहे. सरकारने शिक्षक होण्यासाठी निर्धारित केलेल्या नियमानुसार अनुदानित किंवा शासकीय शाळेत नोकरी करण्यासाठी टीईटी परीक्षा उत्तीर्ण होणे बंधनकारक आहे. त्यानुसार अनेक उमेदवारांनी पैसे देऊन बोगस प्रमाणपत्र प्राप्त केली. त्यामध्ये अनुदानित संस्थांमध्ये या बोगस प्रमाणपत्र देऊन नियुक्त्या मोठ्या प्रमाणात झाल्याची शक्यता आहे. त्या दृष्टीने पोलिस तपास करीत आहेत. आयएएस व आयपीएस अधिकाऱ्यांत जुंपली टीईटी गैरव्यवहाराचे धागेदोरे थेट आयएएस अधिकाऱ्यापर्यंत पोहचल्यानंतर शनिवारी शिक्षण विभागाचे तत्कालीन उपसचिव सुशील खोडवेकर यांना अटक करण्यात आली. प्रशासकीय सेवेतील एका बड्या अधिकाऱ्याचा सहभाग टीईटी गैरव्यवहारात आढळून आल्याने खळबळ उडाली. या आयएएस अधिकाऱ्याला पडद्यामागून मदत करण्यासाठी आयएस लॉबी सक्रिय झाल्याची चर्चा सुरू आहे. या अटकेनंतर आयएस अधिकाऱ्यांनी दबाव आणण्यास सुरुवात केल्याचे बोलले जात आहे.

source https://maharashtratimes.com/career/career-news/tet-scam-2021-police-and-education-department-verifying-fake-tet-certificates-of-2019-20/articleshow/89263914.cms