Hijab Controversy: हायकोर्टच्या निर्णयानंतरही विद्यार्थिनी हिजाब परिधान करुन शाळेत

Controversy: कर्नाटकातील वादाच्या पार्श्वभूमीवर इयत्ता दहवीपर्यंतच्या शाळा सोमवार, १४ फेब्रुवारीपासून पुन्हा सुरू झाल्या. सोमवारी सकाळी अनेक शहरांमध्ये विद्यार्थी गणवेश परिधान करून शाळेत जाताना दिसले. मात्र, हायकोर्टाच्या बंदीनंतरही उडुपीमध्ये अनेक शाळकरी मुली हिजाब आणि बुरखा घालून शाळेत जाताना दिसल्या. दरम्यान धार्मिक कपडे परिधान करुन शाळेत न जाण्याचे आदेश उच्च न्यायालयाने दिले आहेत. या अंतरिम आदेशानुसार काही शाळांमध्ये हिजाब परिधान केलेल्या विद्यार्थिनींना आवारात प्रवेश नाकारण्यात आला. त्यामुळे शाळेतील शिक्षक आणि पालकांमध्ये वाद झालेला पाहायला मिळाला. मात्र शाळा व्यवस्थापनाने सर्वांना हिजाब उतरवल्यानंतरच कॅम्पस आणि वर्गात प्रवेश दिला. दुसरीकडे उडुपी जिल्हा प्रशासनाने खबरदारी घेत रविवारीच सर्व हायस्कूल आणि त्यांच्या आसपासच्या भागात कलम १४४ लागू केले होते. हा आदेश १४ फेब्रुवारी रोजी सकाळी ६ ते १९ फेब्रुवारी रोजी सायंकाळी ६ वाजेपर्यंत लागू राहील. यासाठी शासन आणि जिल्हा प्रशासनाकडून पुरेशी सुरक्षा व्यवस्था करण्यात आली आहे. त्याचबरोबर राज्यात शांतता कायम राखण्याची अपेक्षा मुख्यमंत्र्यांनी व्यक्त केली आहे. राज्यात हिजाब विरुद्ध भगवा गमचा वाद राजकीय आणि धार्मिक रंग घेत असल्याने खबरदारीचा उपाय म्हणून हे पाऊल उचलण्यात आले आहे. यापूर्वी राज्य सरकारने शाळा बंद ठेवण्याचे आदेश दिले होते. जाहीर केलेल्या सुट्या संपल्यानंतर आता सोमवारपासून शाळा पुन्हा सुरू झाल्या आहेत. उच्च न्यायालयाच्या आदेशानंतर कर्नाटक सरकारने शाळा सुरू करण्याचे आदेश दिले आहेत. इयत्ता पहिली ते दहावीपर्यंतच्या शाळा १४ फेब्रुवारीपासून म्हणजेच आजपासून सुरू झाल्या आहेत. विशेष म्हणजे कर्नाटक उच्च न्यायालयाने या प्रकरणी अंतरिम आदेश दिला होता. त्याअंतर्गत शाळा तात्काळ सुरू करून धार्मिक कपडे घालण्यावर बंदी घालण्यात आली आहे. शाळा उघडण्याच्या आदेशानंतर मुख्यमंत्री बसवराज बोम्मई यांनी सर्व जिल्ह्यांतील जिल्हा अधिकारी, पोलिस अधीक्षक आणि इतर अधिकाऱ्यांची व्हिडिओ कॉन्फरन्सिंगद्वारे बैठक घेतली. लवकरच कॉलेज सुरू करण्याचा निर्णय हुबळी येथे पत्रकार परिषदेत मुख्यमंत्री बसवराज बोम्मई म्हणाले की, उद्यापासून दहावीपर्यंतच्या शाळा सुरू होतील. मी डीसी, एसपी आणि शाळा प्रशासनाला शांतता समितीची बैठक आयोजित करण्याचे निर्देश दिले आहेत. उच्च श्रेणीच्या शाळा आणि पदवी महाविद्यालयांच्या स्थितीबाबत आढावा बैठक घेऊन ते नंतर सुरू केले जातील, असे ते म्हणाले. हिजाब वाद सुनावणी कर्नाटकच्या विविध भागात हिजाबच्या विरोधात आणि समर्थनार्थ निदर्शने तीव्र झाल्यामुळे, सरकारने राज्यातील सर्व हायस्कूल आणि महाविद्यालयांना ९ फेब्रुवारीपासून तीन दिवसांची सुट्टी जाहीर करण्यात आली होती. न्यायालयाच्या आदेशानुसार राज्य सरकारने १४ फेब्रुवारीपासून दहावीपर्यंतच्या विद्यार्थ्यांसाठी शाळा पुन्हा सुरू करण्याचा निर्णय घेतला होता. शाळांमधील ड्रेस कोडबाबत राज्य सरकारच्या नियमांना आव्हान देणाऱ्या याचिकांवर कर्नाटक उच्च न्यायालयाने सुनावणी सोमवारपर्यंत पुढे ढकलली आहे. शाळा आणि महाविद्यालयांमधून विद्यार्थी धार्मिक पोशाखाचा आग्रह धरू शकत नाहीत असे यावेळी सरन्यायाधीश रितू राज अवस्थी यांनी म्हटले.

source https://maharashtratimes.com/career/career-news/hijab-controversy-even-after-the-decision-of-the-high-court-the-student-was-wearing-hijab-at-school/articleshow/89564714.cms