Advertisement
in Hindi: हिंदी भाषेतून वैद्यकीय क्षेत्रात उच्च शिक्षण घेऊ इच्छिणाऱ्या विद्यार्थ्यांसाठी महत्वाची बातमी आहे. पुढील शैक्षणिक सत्रापासून अभ्यासक्रम हिंदी भाषेतून (MBBS Course in Hindi)सुरू करण्याची घोषणा करण्यात आली आहे. गांधी मेडिकल कॉलेज, भोपाळ, मध्य प्रदेश (Gandhi Medical College, Bhopal, Madhya Pradesh) येथे पुढील सत्रापासून हिंदीमध्ये एमबीबीएससाठी प्रवेश दिला जाणार आहे. यासंदर्भात मध्य प्रदेशचे मुख्यमंत्री शिवराज सिंह चौहान (Madhya Pradesh Chief Minister Shivraj Singh Chouhan)यांनी प्रजासत्ताक दिनी ही माहिती दिली होती. त्यानंतर, राज्य सरकारचे शिक्षण मंत्री विश्वास सारंग ( Vishwas Sarang) यांनी ८ फेब्रुवारी २०२२ रोजी या वृत्ताला दुजोरा दिला. पुढील शैक्षणिक सत्रापासून म्हणजेच दोन महिन्यात गांधी मेडिकल कॉलेज, भोपाळ येथे हिंदीच्या एमबीबीएस अभ्यासक्रमांना सुरुवात करण्याच्या सूचना शिक्षण विभागाने दिल्या असल्याची माहिती माध्यमांतून समोर येत आहे. यानुसार एमबीबीएस हिंदी अभ्यासक्रमासाठी कृती आराखडा तयार करण्यासाठी वैद्यकीय शिक्षण संचालक डॉ. जितेन शुक्ला यांच्या अध्यक्षतेखाली १४ सदस्यीय समिती स्थापन करण्यात आली आहे. एमबीबीएस हिंदीचा अभ्यासक्रम दोन टप्प्यात एजन्सीच्या अपडेटनुसार, वैद्यकीय विद्यार्थ्यांसाठी (Medical Student) हा एमबीबीएस हिंदी अभ्यासक्रम दोन टप्प्यात सुरू केला जाईल. पहिल्या टप्प्यात, एमबीबीएस अभ्यासक्रमाची निवड करणाऱ्या विद्यार्थ्यांना दोन महिने हिंदी आणि इंग्रजी दोन्ही भाषांमध्ये शिकवले जाईल. तर दुसरा टप्पा हा विद्यार्थी त्यांच्या मुल्यांकनात कशी कामगिरी करतात यावर आधारित असेल. दुसऱ्या टप्प्यात एनाटॉमी, फिजिओलॉजी आणि बायोकेमिस्ट्रीच्या पूरक पुस्तकांचा समावेश केला जाणार आहे. काही दिवसांपूर्वी अटलबिहारी हिंदी विद्यापीठ आणि गांधी वैद्यकीय महाविद्यालयाच्या पदाधिकाऱ्यांच्या उपस्थितीत यासंदर्भात बैठक झाली होती. त्यानुसार शिक्षणमंत्र्यांनी एमबीबीएस प्रथम वर्षाच्या विद्यार्थ्यांसाठी हिंदीमध्ये पुस्तके तयार करण्यासाठी विषयतज्ज्ञांशी चर्चा केली. तसेच, अभ्यासक्रमादरम्यान हिंदीतून व्याख्याने दिली जातील, असे शिक्षणमंत्र्यांनी यावेळी सांगितले होते. हा आराखडा तयार करण्यासाठी शिक्षण विभागाने तीन समित्या स्थापन केल्या आहेत. इंग्रजी भाषेतून शिक्षण घेणे अवघड जाणाऱ्या विद्यार्थ्यांना हिंदीतून एमबीबीएस अभ्यासक्रमाचा फायदा होणार आहे. विद्यार्थ्यांना आपल्या मातृभाषेत विषय समजून घेता येणार आहे.
source https://maharashtratimes.com/career/career-news/mbbs-course-in-hindi-mbbs-studies-will-start-from-the-next-session-education-minister-gave-this-information/articleshow/89446651.cms