.webp)
Advertisement
- डॉ. चंद्रकांत रावळ आपली कल चाचणी विपणन क्षेत्रातील व्यवसायास योग्य, अधिक उपयुक्त आढळल्यास खालील प्रकारचे नियोजन करता येईल. आपण स्वयंमूल्यमापन करावे अथवा करून घ्यावे. त्यामध्ये स्वतःच्या जमेच्या बाजू, उणिवा, संधी व आव्हाने यांचा तपशील लिहावा. विपणन क्षेत्रातील स्वयंरोजगारासाठी काय आवश्यक आहे, त्याचाही तपशील लिहावा. जसे विपणन क्षेत्रासाठी भाषेवर प्रभुत्व, संवाद साधण्याची हातोटी, मुद्देसूद मांडणी, आपले विचार ठामपणे इतरांना पटवून देण्याची कुवत, संशोधन वृत्ती, प्रवासाची आवड, ग्राहकांची पारख, विविध भाषांचा उपयोग करण्याची कला, तौलानिक विश्लेषण करण्याची क्षमता, सातत्याने ग्राहक संपर्क-संवाद न कंटाळता करण्याची तयारी, ध्येयपूर्ती करण्याची धडपड, विचारांची योग्य मांडणी आदी आवश्यक गुणांचा विचार करून वरील विश्लेषणासाठी पडताळणी करावी. ज्या ठिकाणी उणिवा असतील त्यासंदर्भात कृती कार्यक्रम आखून कार्यवाही करावी. समजा संभाषणात उणिवा असल्यास ४-५ वर्षांतील वाणिज्य पदवीसोबतच संभाषण कौशल्याचे वर्ग पूर्ण करावेत. मातृभाषेसह अधिकच्या किमान दोन भाषा शिकून घ्यावात. पाच वर्षांतील सुट्टीच्या, ज्या दर वर्षी दोन वेळा उपलब्ध होतात, त्या काळात विपणन क्षेत्रात उमेदवारी करून अनुभव घ्यावा. सुरुवातीला छोट्या उद्योगात काम करावे, जेणेकरून सर्वच कामांची ओळख होईल. पदवीच्या शेवटच्या दोन वर्षांत तुलनेने मोठ्या (आकाराने / एकूण उलाढालीच्या मूल्याने व विविध वस्तू विक्रीच्या दृष्टीने) जसे मॉल, बहुराष्ट्रीय कंपन्यांची विक्री केंद्र, जागतिक किरकोळ व्यापारी व्यवसायाची साखळी केंद्रे येथे काम करावे. यातून आवश्यक पुस्तकी ज्ञानासोबत प्रत्यक्ष कामाचा अनुभव प्राप्त होईल. अकरावी ते बी.कॉम पदवी अशा पाच वर्षांतील कामगिरी व प्रत्यक्ष अनुभवानुसार पदव्युत्तर शिक्षण जसे एमकॉम किंवा एमपीएम किंवा एमबीए (मार्केटिंग)अशी आणखी दोन वर्षे स्वकमाईतून शिक्षण घेता येईल. नंतर दुसऱ्या वर्षासाठीचा प्रकल्प हा याच अनुभवाशी निगडित निवडून, प्रकल्प अहवाल पूर्ण करून निश्चितपणे उत्तम आर्थिक लाभाची नोकरी प्राप्त होऊ शकते. स्वतःचा व्यवसाय वितरण व्यवस्था, विक्री संस्था, साठवणूक केंद्र, जाहिरात संस्था, इ. व्यवसायही करता येईल. प्रत्यक्ष वस्तू व सेवांचीच विक्रीच करावयास हवी असा अट्टाहास नसावा, त्यास साह्यभूत अशा विविध सेवा पुरविणाऱ्या संस्थाही आपण कार्यक्षमपणे चालवू शकाल व इतरांनाही रोजगार उपलब्ध करून देता येईल. भारतातील ग्रामीण विपणनमधील असे यशस्वी नाव प्रदीप लोखंडे यांचे असून त्यांची स्वतःची संस्था विपणनासंदर्भात विविध सेवा पुरवित आहे. (लेखक बीएमसीसीचे माजी प्राचार्य आहेत.)
from Career News in Marathi: Career News, मराठी Career बातम्या | Maharashtra Times https://ift.tt/2Um93B6
via nmkadda
