Advertisement
म. टा. प्रतिनिधी, नाशिक राज्य तंत्रशिक्षण मंडळामार्फत () पदविका अभ्यासक्रमांच्या प्रथम सत्रातील परीक्षा पुढे ढकलण्यात आल्या होती. या परीक्षा १० नोव्हेंबरपासून ऑनलाइन पद्धतीने सुरू होणार असून, 'एमएसबीटीई'मार्फत या परीक्षांचे वेळापत्रकही जाहीर करण्यात आले आहे. राज्यभरातील पदविका अभ्यासक्रमांना शैक्षणिक वर्ष २०२१-२२ मध्ये प्रवेश घेतलेल्या विद्यार्थ्यांच्या पहिल्या घटक चाचणी परीक्षा १० नोव्हेंबरपासून सुरू होणार आहेत. तंत्रशिक्षण मंडळामार्फत या परीक्षांचे टप्प्याटप्प्याने आयोजन करण्यात आले असून, १० ते १२ नोव्हेंबरदरम्यान तिसऱ्या, पाचव्या आणि सातव्या सत्राच्या परीक्षा होणार आहेत. २४ ते २६ नोव्हेंबरदरम्यान पहिल्या आणि तिसऱ्या सत्रामध्ये नव्याने प्रवेश घेतलेल्या विद्यार्थ्यांच्या परीक्षा होणार आहेत. याच कालावधीत वार्षिक पद्धतीच्या 'एआयसीटीई' व 'नॉन एआयसीटीई' अभ्यासक्रमांना प्रवेश घेतलेल्या विद्यार्थ्यांच्या परीक्षा होणार आहेत. १३ ते १८ डिसेंबरदरम्यान फार्मसी पदविकेच्या पहिल्या वर्षाला प्रवेश घेतलेल्या विद्यार्थ्यांच्या परीक्षांचे आयोजन करण्यात आले आहे, तर १५ ते १७ डिसेंबरदरम्यान 'एआयसीटीई' व 'नॉन एआयसीटीई' वार्षिक अभ्यासक्रमांना नव्याने प्रवेश घेतलेल्या विद्यार्थ्यांच्या परीक्षा होणार आहेत. या सर्व परीक्षा ऑनलाइन पद्धतीने होणार असून, विद्यार्थी लॅपटॉप, डेस्कटॉप, टॅब्लेट या माध्यमातून त्यांच्या घरातून किंवा अन्य ठिकाणाहूनही या परीक्षा देऊ शकणार आहेत. बहुपर्यायी स्वरुपाचे प्रश्न या परीक्षेत विचारले जाणार आहेत. 'एमएसबीटीई'मार्फत २७ ऑक्टोबर ते २४ नोव्हेंबरदरम्यान या परीक्षांचे आयोजन करण्यात आले होते. परंतु, महाविद्यालये सुरू झाल्यानंतर २५ ऑक्टोबर ते २ नोव्हेंबरदरम्यान उच्च व तंत्रशिक्षण विभागामार्फत महाविद्यालयीन विद्यार्थ्यांसाठी लसीकरण मोहीम राबविण्याची सूचना देण्यात आली होती. त्यामुळे या परीक्षा पुढे ढकलण्यात आल्याचे राज्य तंत्रशिक्षण मंडळामार्फत स्पष्ट करण्यात आले.
from Career News in Marathi: Career News, मराठी Career बातम्या | Maharashtra Times https://ift.tt/3woTCHk
via nmkadda