.webp)
Advertisement
Central Universities News: देशातील १४ केंद्रीय विद्यापीठांमध्ये ४० टक्क्यांहून अधिक पदं रिक्त आहेत. केंद्रीय शिक्षणमंत्री धर्मेंद्र प्रधान यांनी राज्यसभेत ही माहिती दिली. मीडिया रिपोर्टनुसार, शिक्षणमंत्र्यांनी लेखी उत्तरात राज्यसभेला सांगितले की, ४४ पैकी १४ केंद्रीय विद्यापीठांमध्ये ४० टक्क्यांहून अधिक शैक्षणिक पदं रिक्त आहेत. यामध्ये दिल्ली विद्यापीठ आणि इलाहाबाद विद्यापीठात सर्वाधिक जास्त ७० टक्क्यांहून अधिक शैक्षणिक पदं रिक्त आहे. ४४ केंद्रीय विद्यापीठांमध्ये साधारण १९ हजार शैक्षणिक पदांपैकी ६ हजारहून अधिक पदं यावर्षी १ एप्रिलपर्यंत रिक्त होती. दिल्ली विद्यापीठामध्ये सर्वाधिक पदं रिक्त आहेत. या विद्यापीठात स्वीकृत शिक्षण पदाच्या एकूण १ हजार ७०६ जागा आहेत, ज्यामध्ये ८४६ जागा रिक्त आहेत. यानंतर इलाहाबाद विद्यापीठाचा नंबर लागतो. इथे ८६३ स्वीकृत शिक्षण पदांपैकी ५९८ पदं रिक्त आहेत. तसेच केंद्रीय विद्यापीठांमध्ये २२ कुलगुरुंची पदं रिक्त आहेत अशी माहिती शिक्षण मंत्रालयाने राज्यसभेला दिली. केंद्रीय शिक्षणमंत्र्यांनी दिलेल्या माहितीनुसार, यावर्षी १ एप्रिलपर्यंत केंद्रीय विद्यापीठामध्ये ३३.४ टक्के शैक्षणिक पदं आणि ३७.७ टक्के शिक्षणेत्तर पदं रिक्त होती. ४४ केंद्रीय विद्यापीठांमध्ये ५० टक्क्यांहून अधिक म्हणजे २३ विद्यापीठांमध्ये ३० टक्क्यांहून अधिक रिक्त पदं आहेत. तर ३ विद्यापीठांमध्ये २० टक्क्यांहून कमी पदं रिक्त आहेत. पदं रिक्त राहणे आणि भरली जाणे ही सातत्याची प्रक्रिया आहे. तीन वर्षांहून अधिक वर्षांपासून रिक्त असलेल्या पदांचा डेटा केंद्रीय स्तरावर ठेवला जात नाही. केंद्रीय विद्यापीठामध्ये कुलगुरु नियुक्ती ही वेळ लागणारी प्रक्रिया आहे. यासाठी संबंधित केंद्रीय विद्यापीठाची कार्यकारी परिषद / न्यायालयाचे नामांकन प्राप्त करणे, शोध-सह-निवड समिती, पदांची जाहिरात याचा समावेश असतो असे शिक्षणमंत्र्यांनी म्हटले.
from Career News in Marathi: Career News, मराठी Career बातम्या | Maharashtra Times https://ift.tt/3zuYVFo
via nmkadda
