Advertisement
अभियांत्रिकी, औषधनिर्माण व कृषी अभ्यासक्रम प्रवेशासाठी राज्य सामायिक प्रवेश परीक्षा कक्षातर्फे (CET Cell) आयोजित करण्यात येणाऱ्या एमएचटी-सीईटी परीक्षेला (MHT 2021) सोमवारपासून सुरुवात झाली. ही संगणकीकृत परीक्षा असणार आहे. परीक्षेसाठी तीन तासांचा कालावधी असेल. कोविड १९ संबंधित सर्व आरोग्यविषयक नियमांचे पालन करून ही ऑफलाइन परीक्षा घेण्यात येणार आहे. १ ऑक्टोबरपर्यंत विविध सत्रांमध्ये परीक्षेचे आयोजन करण्यात आले आहे. उमेदवार आणि अन्य सीईटी परीक्षांच्या तारखा (MHT CET exam dates 2021) mhtcet2021.mahacet.org या अधिकृत संकेतस्थळावर पाहू शकतात. यावर्षी एकूण ८ लाख ५५ हजार ८६९ विद्यार्थी सीईटी परीक्षेला बसणार आहेत. मागील वर्षी सीईटीसाठी एकूण १९८ परीक्षा केंद्रे होती. यंदा कोविड -१९ संक्रमण स्थितीच्या पार्श्वभूमीवर या केंद्रांमध्ये वाढ करण्यात आली आहे. यंदा २२६ केंद्रांवर सीईटी परीक्षेचं आयोजन केलं जाणार आहे. यासाठी एकूण ५० हजार संगणक राज्यभर सज्ज आहेत, मात्र कोविडचं बंधन असल्यामुळे २५ हजार संगणकांचाच परीक्षेसाठी वापर होणार आहे. राज्य माध्यमिक आणि उच्च माध्यमिक शिक्षण मंडळाच्या इयत्ता बारावीच्या परीक्षा यंदा करोनामुळे रद्द करण्यात आल्या होत्या. विद्यार्थ्यांचे दहावी आणि अकरावीचे गुण तसेच बारावीच्या अंतर्गत मूल्यमापनाच्या आधारे गुण देऊन मूल्यांकन करण्यात आले. मेडिकल आणि इंजिनीअरिंग प्रवेशांसाठी महाराष्ट्र कॉमन एन्ट्रन्स टेस्ट अर्थात सीईटी परीक्षेचे आयोजन करण्यात येते.
from Career News in Marathi: Career News, मराठी Career बातम्या | Maharashtra Times https://ift.tt/39kQWjp
via nmkadda