.webp)
Advertisement
म. टा. विशेष प्रतिनिधी, मुंबई करोनामुळे मागील २० महिन्यांहून अधिक काळ न पाहिलेल्या मुलांना आता शाळेत जाता येणार आहे. पाचवी ते बारावीचे वर्ग (5th to 12th std reopening) सुरू झाल्यानंतर आता ग्रामीण भागांत पहिली ते चौथी आणि शहरी भागांत पहिली ते सातवीचे वर्गही ऑफलाइन सुरू करण्याचा महत्त्वाचा निर्णय राज्य सरकारने घेतला आहे. या शाळा येत्या १ डिसेंबरपासून सुरू होणार आहेत. पाल्यांना शाळेत पाठवण्याचा निर्णय मात्र तूर्त ऐच्छिक असणार आहे. विद्यार्थ्यांना शाळेत येण्याची सक्ती केली जाणार नाही. शाळांसाठी खबरदारीचे उपाय आणि इतर नियमावली लवकरच जारी करण्यात येणार आहेत. शालेय शिक्षणमंत्री प्रा. वर्षा गायकवाड (Varsha Gaikwad) यांनी राज्य मंत्रिमंडळाच्या बैठकीत (Maharashtra Cabinet Meeting) झालेल्या निर्णयाची माहिती दिली. प्राथमिक शाळा सुरू करण्याचा प्रस्ताव शालेय शिक्षण विभागाने मंत्रिमंडळ बैठकीत मांडला होता. त्याला आरोग्य विभाग तसेच बालरोग तज्ज्ञांच्या कृती दलाने परवानगी दिली आहे. शाळा सुरू करताना विद्यार्थ्यांच्या आरोग्याची पूर्ण काळजी घेतली जाणार असून याबाबतच्या मार्गदर्शक सूचनाही लवकरच जाहीर करण्यात येणार असल्याचे त्यांनी सांगितले. ग्रामीण भागांतील पाचवी ते बारावी आणि शहरी भागांतल्या आठवी ते बारावीचे वर्ग सुरू करण्याचा निर्णय याआधीच घेतला आहे. मात्र पहिली ते चौथीपर्यंतचे वर्ग सुरू करण्याबाबत अनेक मतमतांतरे होती. या विद्यार्थ्यांचे शैक्षणिक नुकसान टाळण्यासाठी शाळा वेळेत सुरू होणे आवश्यक आहे, असे मत शिक्षणतज्ज्ञ व्यक्त करत होते. यानंतर या प्रस्तावाबाबत आरोग्य विभागाचा अभिप्राय घेऊन कृती दलाच्या तज्ज्ञांशीही चर्चा केली होती. त्यानंतर मुख्यमंत्री उद्धव ठाकरे (Uddhav Thackeray) यांनाही हा प्रस्ताव पाठवला होता. गुरुवारच्या बैठकीत सर्वानुमते हा निर्णय घेण्यात आल्याचे गायकवाड यांनी सांगितले. काही विद्यार्थी पहिल्यांदाच प्रत्यक्ष शाळेत येतील, त्यांचे आणि इतर विद्यार्थ्यांचे आरोग्य जपणे, याला प्राथमिकता असेल. लहान मुलांसाठी जर अधिकची खबरदारी घेण्याची आवश्यकता असेल तर त्याबाबतही तज्ज्ञांशी चर्चा करण्यात येईल, , असे वर्षा गायकवाड म्हणाल्या. मुंबई महापालिका (BMC) मास्क (Mask), साबण पुरवणार राज्य सरकारने पहिलीपासूनच्या शाळा सुरू करण्याचा निर्णय घेतल्यानंतर महापालिकेच्या शिक्षण विभागाने आवश्यक तयारी सुरू केली आहे. त्यात विद्यार्थ्यांना मास्क, हात धुण्यासाठी साबण, प्रवेशद्वारावर तापमान तपासणी, आदी सुविधा पुरविल्या जाणार आहेत. इमारतींचे निर्जंतुकीकरण करोना नियम पाळूनच शाळा सुरू होणार आहेत. पालिका शिक्षण विभागाच्या अंतर्गत पहिली ते दहावीपर्यंत १,१५९ शाळा असून साधारण ५०० इमारती आहेत. त्या इमारतींमध्ये दोन दिवसांतच निर्जंतुकीकरण केले जाणार आहे. प्रवेश देण्याबाबतचे नियम लवकरच महापालिकेच्या आठवी ते दहावीपर्यंतच्या शाळा सुरू करतेवेळी विद्यार्थ्यांना पालकांच्या संमतीपत्रानंतरच शाळेत प्रवेश देण्यात आला होता. तसेच, विद्यार्थ्यांना एकाचवेळी एकत्रित न बोलविता समूहाने, दिवसाआड पाचारण करण्यात आले. त्यामुळे, आता पहिली ते सातवीची शाळा सुरू करताना विद्यार्थ्यांना प्रवेश कसा देणार, याबाबतचा निर्णय लवकरच घेतला जाणार असल्याचे पालिका अधिकाऱ्यांनी स्पष्ट केले आहे. राज्यातील शाळानिहाय शिक्षक, विद्यार्थ्यांची संख्या (पहिली ते सातवी) शाळेचा प्रकार विद्यार्थी प्राथमिक शिक्षक उच्च प्राथमिक सरकारी ४९,६३,८७२ १,८४,३०७ ५१,९१४ खासगी अनुदानित ४२,३०,९७४ ५५,०५१ ७७,९७७ खासगी विनाअनुदानित ४१,८४,७३५ ८७,५४१ ५१,००७ मदरसे व अन्य १,०६,२९८ ३०६५ १२०१ मुंबई विभागातील शाळा, विद्यार्थी संख्या (पहिली ते सातवी) विभाग शाळा विद्यार्थी मुंबई महापालिका २५४१ ६,६४,२१४ मुंबई डीवायडी १८०२ ५,०८,२१८ ठाणे ४९५८ १०,८२,५३६ रायगड ३७११ ३,३२,५३६ पालघर ३४४८ ५,३०,५७३ -राज्यात सध्या पहिली ते सातवीचे सुमारे एक कोटी ३४ लाख ८५ हजार ८७९ विद्यार्थी आहेत. तर पाच लाख १२ हजार ६३ शिक्षक आहेत. -मुंबई महापालिकेच्या पहिली ते दहावीपर्यंतच्या शाळांमध्ये २,९२,७८४ विद्यार्थी आहेत. त्यापैकी पहिली ते सातवीपर्यंत २,२०,८६१ आणि आठवी ते दहावीपर्यंत ७१,९२३ विद्यार्थी आहेत. -राज्यातील शाळा सुरू करण्याचा हा तिसरा टप्पा आहे. या कालावधीत सुरक्षित वातावरणात शिक्षण सुरू राहण्यासाठी परिश्रम घेतलेल्या शाळा आणि शिक्षकांचे शिक्षणमंत्र्यांनी कौतुक केले आहे.
from Career News in Marathi: Career News, मराठी Career बातम्या | Maharashtra Times https://ift.tt/32pEnTC
via nmkadda
