.webp)
Advertisement
म. टा. विशेष प्रतिनिधी, मुंबई वर्षभर करोनाच्या सावटाखाली जगत असताना, ऑनलाइन शिक्षणाला विशेष महत्त्व प्राप्त झाले आहे. यातूनच ऑनलाइन व ऑफलाइन यांचा मेळ असलेल्या संकरित शिक्षण पद्धतीचा उगम होऊ पाहत आहे. याच दृष्टीने एक पाऊल म्हणजे विद्यापीठ अनुदान आयोगाने आता ४० टक्के क्रेडिट हे ऑनलाइन शिक्षणाला देण्याचा निर्णय घेतला आहे. मात्र, यासाठी आवश्यक ती ऑनलाइन शिक्षण सुविधा उपलब्ध नसल्याचे मत शिक्षणतज्ज्ञ व्यक्त करत आहेत. उच्च शिक्षणात आतापर्यंत २० टक्के क्रेडिट हे ऑनलाइन शिक्षणाला देण्यात येत होते. मात्र, आता ते ४० टक्के इतके करण्यात येणार आहे. याबाबत मागील वर्षापासून चर्चा सुरू होती. यानंतर अखेर याबाबतची अधिसूचना नुकतीच जारी करण्यात आली आहे. याचबरोबर लवचिक शिक्षण पद्धतीचा मसुदाही आयोगाने जाहीर केला आहे. हा अभ्यासक्रम विद्यार्थ्यांना 'स्वयम्'या ऑनलाइन पोर्टलच्या माध्यमातून पूर्ण करता येणार आहे. विद्यापीठ अनुदान आयोगाने यासाठी 'तरुणांसाठी सक्रिय वेबआधारीत ऑनलाइल अभ्यासक्रम श्रेयांक मार्गदर्शक अधिनियम २०२१'प्रसिद्ध केला आहे. या ऑनलाइन क्रेडिटचे अभ्यासक्रमही नियमित शैक्षणिक वर्षातील सत्र समाप्तीच्या जानेवारी आणि जुलै या दोन महिन्यांतच समाप्त होणार आहेत. ऑनलाइन शैक्षणिक साहित्याचे काय? आयोगाने केलेली सूचना स्तुत्य आहेच, मात्र आपल्याकडे त्या दर्जाचे आणि त्या स्वरूपाचे ऑनलाइन शैक्षणिक साहित्य उपलब्ध आहे का, असा प्रश्न ज्येष्ठ शिक्षणतज्ज्ञ आणि आयआयटीतील माजी प्राध्यापक बी. एन. जगताप यांनी उपस्थित केला आहे. ऑनलाइन शिक्षणासाठी सर्व विद्यापीठांनी एकत्र येऊन चांगले शैक्षणिक साहित्य निर्माण करेणे आवश्यक आहे. सध्या आपल्याकडे ऑनलाइन शिक्षणासाठी जे शैक्षणिक साहित्य उपलब्ध आहे ते साहित्य म्हणजे व्हिडीओच्या माध्यमातून शिकविणे अशा स्वरूपाचे आहे. मुलांना पडलेल्या प्रश्नांची उत्तरे तेथून मिळणे आवश्यक आहे. ही गरज कशी भरून काढणार, असा प्रश्नही त्यांनी उपस्थित केला आहे. आज आयआयटीमध्ये जी व्याख्याने होतात ती रेकॉर्ड करून पोर्टलवर उपलब्ध करून देण्यात येत आहेत. मात्र, अशी सोय इतर कोणत्याही विद्यापीठांमध्ये नाही. यामुळे हे सुरू करण्यापूर्वी चांगल्या प्रकारे शैक्षणिक साहित्याची निर्मिती आवश्यक असल्याचेही प्रा. जगताप म्हणाले. विद्यार्थ्यांची मानसिकता बदलणेही आवश्यक हा सर्व बदल करत असतातना विद्यार्थ्यांची मानसिकता बदलणेही आवश्यक आहे, असे मत करिअर कौन्सिलर आनंद मापुस्कर यांनी सांगितले. विद्यार्थ्यांना ऑनलाइन शिक्षणाची सवय गेल्या वर्षभरातच लागली आहे. यासाठी आवश्यक ती साधने काही प्रमाणात पोहचत आहेत. मात्र ती पुरेशी नाहीत ग्रामीण भागात मोठा वर्ग हा अद्याप स्मार्टफोनवर या शिक्षणासाठी अवलंबून आहे. अशा प्रकारे ऑनलाइन शिक्षणाला महत्त्व द्यायचे असेल, तर याची पूर्ण तयारी करून मगच अंमलबजावणी करणे आवश्यक असल्याचे मतही त्यांनी व्यक्त केले आहे.
from Career News in Marathi: Career News, मराठी Career बातम्या | Maharashtra Times https://ift.tt/3oMSDNq
via nmkadda
