.webp)
Advertisement
राज्य सरकारने सोमवारी २८ जून रोजी कार्यक्रमाचा शुभारंभ केला. करोना विषाणू महामारीमुळे राज्यातील सर्वच शाळांमध्ये शिक्षण ऑनलाइन पद्धतीने सुरू आहे. अशा वेळी मागच्या सत्रात विद्यार्थी कोणत्या क्षमतेत मागे पडलेले आहे हे शोधून त्या क्षमतांची तयारी करून घेणे, हा या सेतू अभ्यासक्रम किंवा ब्रीज कोर्सचा उद्देश आहे. शालेय शिक्षणमंत्री यांच्या हस्ते या उपक्रमाचे उद्घाटन व्हर्च्युअल पद्धतीने झाले. सेतू अभ्यासक्रम राबविण्याविषयक सविस्तर सर्व सूचना शिक्षक व विद्यार्थ्यांसाठी अभ्यासक्रमाच्या सुरुवातीला देण्यात आलेल्या आहेत. तसेच अधिक संबोध स्पष्ट ते करिता ई-साहित्याच्या लिंक देण्यात आलेल्या आहेत. १ जुलै २०२१ ते १४ ऑगस्ट २०२१ या कालावधीमध्ये सेतू अभ्यासक्रमाची अंमलबजावणी एकूण ४५ दिवसांकरिता करावयाची आहे. त्यानंतरच सद्याच्या इयत्तेचा अभ्यास सुरू करायचा आहे. कसा असेल दुसरी ते दहावीचा ब्रीज कोर्स? - इयत्ता दुसरी ते दहावीच्या मराठीव उर्दू माध्यमाच्या मराठी,गणित,इंग्रजी,विज्ञान,हिंदी व सामाजिक शास्त्रे या विषयांसाठी ४५ दिवसांचा सेतू अभ्यासक्रम तयारकरण्यात आलेला आहे. - सेतू अभ्यासक्रम इयत्तानिहाय व विषयनिहाय तयार करण्यात आला असून मागील इयत्तांच्या महत्त्वाच्या क्षमतांवर आधारित आहे. हा अभ्यासक्रम सर्व व्यवस्थापनाच्या शाळांमधील विद्यार्थ्यांनी पूर्ण करावयाचा आहे. - शिक्षक व विद्यार्थ्यांसाठी सदर सेतू अभ्यासक्रम राबविण्याविषयक सविस्तर सूचना सेतू अभ्यासक्रमाच्या सुरुवातीला देण्यात आलेल्या आहेत. - सेतू अभ्यासक्रमामध्ये दिवसनिहाय कृतिपत्रिका (worksheets) देण्यात आल्या असून सदर कृतिपत्रिका या विद्यार्थीकेंद्रित, कृतीकेंद्रित तसेच अध्ययन निष्पत्ती आधारित आहेत.विद्यार्थी स्वयंअध्ययन करू शकतील असे त्यांचे स्वरूप आहे. - विद्यार्थ्यांनी त्या त्या दिवसाची कृतिपत्रिका शिक्षक / पालक / शिक्षक मित्र / सहाध्यायी / स्वयंसेवक / विद्यार्थी मित्र यांच्या मदतीने सोडवाव्यात. या विषयनिहाय सर्व कृतिपत्रिका विद्यार्थ्यांनी स्वतंत्र वहीमध्ये किंवा शक्य असल्यास त्यांची छपाई ( print) करून त्यामध्येही सोडवू शकतात जेणेकरून शिक्षकांना अंतर्गत मूल्यमापनासाठी त्यांचा उपयोग होईल. - सेतू अभ्यासक्रमामध्ये ठराविक कालावधीनंतर ३ चाचण्या देण्यात आलेल्या आहेत. त्या विद्यार्थ्यांनी सोडविणे आवश्यक आहे. शिक्षकांनी या चाचण्या विद्यार्थ्यांकडून ऑनलाईन/ऑफलाईन पद्धतीनेसोडवून घेऊन त्या तपासाव्यात. या चाचण्यांच्या गुणांची नोंद शिक्षकांनी स्वतःकडे ठेवणे आवश्यक आहे. शिक्षणमंत्र्यांनी दिल्या शुभेच्छा कार्यक्रमाच्या शुभारंभाच्या वेळी शालेय शिक्षणमंत्री वर्षा गायकवाड म्हणाल्या, 'आता २०२१-२०२२ हे नवीन शैक्षणिक सत्र सुरु झाले आहे. मागील सत्रात शाळा बंद पण शिक्षण सुरु या उपक्रमातून व विविध माध्यमातून विद्यार्थ्यांच्या शिक्षणासाठीचे सर्वच स्तरावरून प्रयत्न केले गेले. पण तरीही प्रत्यक्ष शिक्षक विद्यार्थ्यांपर्यंत न पोहचू शकल्यामुळे विद्यार्थ्यांना विषयनिहाय क्षमता संपादित होण्यामध्ये अडचणी निर्माण झाले असण्याची शक्यता नाकारता येत नाही. त्यामुळे मागील वर्षातील क्षमता संपादित न होता विद्यार्थी पुढील शैक्षणिक वर्षामध्ये प्रविष्ट झाले असण्याची शक्यता गृहीत धरून त्याला मागील भागाची उजळणी व्हावी, मागील इयत्तेतील क्षमता आणि आता प्रविष्ट इयत्तेतील क्षमता यांचा सेतू साधला जावा म्हणून दिनकर टेमकर, संचालक, राज्य शैक्षणिक संशोधन व प्रशिक्षण परिषद महाराष्ट्र, पुणे व त्यांच्या टीमने कमी वेळात अत्यंत भरीव स्वरूपाचे काम या सेतू अभ्यासक्रमाच्या निर्मितीच्या रुपात केले आहे. त्यांच्या सर्व टीमचे मी अभिनंदन करते.' सेतू अभ्यासक्रम www.maa.ac.in या संकेतस्थळावर उपलब्ध करून देण्यात आला आहे. याचा लाभ सर्व शिक्षक, विद्यार्थी व पालक यांनी करून घ्यावा, असे आवाहन शिक्षण विभागाने केले आहे.
from Career News in Marathi: Career News, मराठी Career बातम्या | Maharashtra Times https://ift.tt/3A6Bd3K
via nmkadda
