Advertisement
म. टा. प्रतिनिधी, पुणे राज्याच्या उच्च व तंत्रशिक्षण विभागातर्फे उच्च शिक्षणासाठी महाडीबीटी (MahaDBT) पोर्टलद्वारे देण्यात येणाऱ्या १४ वेगवेगळ्या शिष्यवृत्तींच्या अर्ज प्रक्रियेला मुदतवाढ देण्यात आली आहे. विद्यार्थ्यांना २०२०-२१ च्या शैक्षणिक वर्षासाठी आता १५ जुलैपर्यंत अर्ज करता येणार असून २०१९-२० या शैक्षणिक वर्षासाठी अर्ज केलेल्या विद्यार्थ्यांच्या अर्जांमध्ये त्रुटी असल्यास त्यांनाही १५ जुलैपर्यंत पुन्हा अर्ज करण्यासाठी संधी देण्यात आली आहे. राज्याच्या उच्च व तंत्रशिक्षण विभागातर्फे व्यावसायिक अभ्यासक्रमांसाठी आर्थिकदृष्ट्या दुर्बल घटक, ओबीसी, अनुसूचित जाती, अल्पसंख्याक अशा विविध प्रवर्गात मोडणाऱ्या विद्यार्थ्यांना शिष्यवृत्ती दिली जाते. शैक्षणिक शुल्कात सवलत; तसेच वसतिगृहाच्या शुल्कासाठी भत्ता, अशा स्वरूपाच्या वेगवेगळ्या चौदा शिष्यवृत्ती दिल्या जातात. या शिष्यवृत्तींना हजारो विद्यार्थी दर वर्षी अर्ज करतात. २०२०-२१ या शैक्षणिक वर्षासाठी शिष्यवृत्ती मिळावी, यासाठी विद्यार्थ्यांना अर्ज करण्यासाठी ५ जुलैपर्यंत मुदत देण्यात आली होती. आता त्यामध्ये वाढ करून १५ जुलैपर्यंत मुदत देण्यात आली आहे. २०१९-२० मध्ये ज्या विद्यार्थ्यांनी केलेल्या अर्जांमध्ये त्रुटी आहेत, अशा विद्यार्थ्यांनाही अर्ज करण्यासाठी पुन्हा एकदा संधी देण्यात आली आहे. या विद्यार्थ्यांनी आधीच्या अर्जांमधील सर्व त्रुटी दूर करून पुन्हा अर्ज करावेत, अशा सूचना देण्यात आल्या आहेत. शिष्यवृत्तीसाठी नव्याने अर्ज करण्यासाठी... १. mahaDBT पोर्टलवर रजिस्टर करून लॉग इन आयडी, पासवर्ड तयार करा. २. पोर्टलवर लॉग इन व्हा. ३. तुमचे प्रोफाइल तयार करा. ४. ज्या शिष्यवृत्तीसाठी पात्र आहात त्यासाठी अर्ज करा. पुन्हा अर्ज करणाऱ्यांसाठी... १. लॉग इन करा. २. त्रुटी असलेला अर्ज दिसेल. ३. त्यामध्ये दुरुस्ती करून पुन्हा एकदा 'सबमिट' करा.
from Career News in Marathi: Career News, मराठी Career बातम्या | Maharashtra Times https://ift.tt/3hnXfaw
via nmkadda
