इंजिनीअरिंग व फार्मसी डिप्लोमाच्या प्रात्यक्षिक परीक्षांना सुरुवात

Advertisement

म. टा. प्रतिनिधी, नाशिक महाराष्ट्र राज्य तंत्रशिक्षण महामंडळामार्फत () सोमवार ३ जानेवारीपासून इंजिनीअरिंग व फार्मसी पदविका अभ्यासक्रमांच्या प्रात्यक्षिक परीक्षा होणार आहेत. या प्रात्यक्षिक परीक्षा ऑनलाइन पद्धतीने होणार असून, लेखी परीक्षा १८ जानेवारीपासून होणार आहेत. 'एमएसबीटीई'मार्फत ऑनलाइन पद्धतीने होणाऱ्या या परीक्षा विविध मीटिंग अॅपद्वारे महाविद्यालय स्तरावर होणार असून, यामध्ये प्रात्यक्षिकावर आधारित तोंडी प्रश्न विद्यार्थ्यांना विचारले जाणार आहेत. सध्या विद्यार्थी ज्या ठिकाणी वास्तव्यास आहेत, त्या ठिकाणाहून त्यांना ही परीक्षा देता येणार आहे. या परीक्षांचे वेळापत्रक 'एमएसबीटीई'मार्फत जाहीर करण्यात आले आहे. वार्षिक अभ्यासक्रमाच्या आणि पहिल्या व तृतीय सत्रातील नवीन प्रवेशित विद्यार्थी सोडून अन्य विद्यार्थ्यांच्या प्रात्यक्षिक परीक्षा आजपासून सुरू होत आहेत. पहिल्या व तिसऱ्या सत्रामध्ये नव्याने प्रवेश घेतलेल्या विद्यार्थ्यांसाठी १० ते १५ जानेवारीदरम्यान या प्रात्यक्षिक परीक्षा घेतल्या जाणार आहेत. इंजिनीअरिंग व फार्मसी पदविका अभ्यासक्रमाच्या लेखी परीक्षा १८ जानेवारी ते ९ फेब्रुवारीदरम्यान आयोजित करण्यात आल्या असून, त्याचे स्वतंत्र वेळापत्रक वेबसाइटवर जाहीर केले जाणार आहे. या लेखी परीक्षा बहुपर्यायी प्रश्न पद्धतीने घेतल्या जाणार आहेत. मात्र, इंजिनीअरिंग पदविकेच्या अभ्यासक्रमातील काही विषयांमध्ये ड्रॉइंगचा समावेश असल्यामुळे या विषयांची परीक्षा बहुपर्यायी प्रश्न पद्धतीने घेतली जाणार नाही. संबंधित विषयाच्या अभ्यासक्रमावर आधारित सादरीकरणावर ही परीक्षा ऑनलाइन पद्धतीने घेतली जाणार आहे. ज्या विद्यार्थ्यांकडे ऑनलाइन परीक्षा देण्याची कोणतीही सुविधा उपलब्ध नाही, त्यांच्यसाठी जवळच्या तंत्रनिकेतनमध्ये परीक्षेची सुविधा उपलब्ध करून देण्याची सूचना एमएसबीटीई'मार्फत करण्यात आली आहे. गैरप्रकारांसाठी शिक्षा निश्चित यंदापासून 'एमएसबीटीई'मार्फत ऑनलाइन परीक्षांमधील गैरप्रकारांसाठी शिक्षाही निश्चित करण्यात आल्या आहेत. प्रॉक्टर्ड पद्धतीने होणाऱ्या या परीक्षांमध्ये विद्यार्थ्याच्या हलचालींवर बारीक लक्ष ठेवले जाणार असून, काही आक्षेपार्ह आढळल्यास आधी त्याला काही वेळा सूचना दिल्या जाणार आहेत. त्यानंतरही तो गैरप्रकार करीत असल्याचे दिसल्यास संबंधित शिक्षेसाठी तो पात्र ठरणार आहे. या शिक्षेबद्दलची सविस्तर माहितीही मंडळाच्या वेबसाइटवर उपलब्ध करून देण्यात आली आहे.

source https://maharashtratimes.com/career/career-news/msbte-diploma-practical-exams-started-from-january-3-theory-exams-from-january-18/articleshow/88660404.cms